اسلام آباد(مانیٹرنگ ڈیسک)اوورسیزپاکستانیوں سے حاصل زر مبادلہ میں اضافے کے لیے تجاویز وزیراعظم عمران خان کو پیش ۔میڈیا رپورٹس کے مطابق صوبائی وزیرصنعت میاں اسلم اقبال نے بیرونِ ممالک سے پیسہ بھیجنے والے پاکستانیوں کو غیرمعمولی سہولیات فراہم کرنے کی تجاویز دے دیں۔

تجاویز پر عمل درآمد کی صورت میں10ارب ڈالر زرمبادلہ بڑھنے کا تخمینہ لگایا گیا ہے۔میاں اسلم اقبال نے تجویز پیش کی ہے کہ زرمبادلہ بھیجنے والے پاکستانیوں کے بچوں کی نجی سکولوں کی فیس میں 25فیصد رعایت فراہم کی جائے اوراس ضمن میں پنجاب حکومت فیس میں رعایت دینے کے لیے قانون سازی کرے۔ انہوں نے غیر ملکی کرنسی بھیج کر گھر یا پلاٹ خریدنے والے پاکستانیوں کو ٹیکس میں 50فیصدرعایت دیے جانے کی تجویزبھی پیش کی اور ساتھ یہ بھی تجویز دی ہے کہ اوورسیز پاکستانیوں کے خاندانوں کو ہیلتھ کارڈ جاری کیے جائیں۔ایک تجویز یہ بھی دی گئی ہے کہ مقررہ شرح سے اوپر زرمبادلہ بھیجنے والے شخص کو پی آئی کا واپسی کا ٹکٹ دیا جائے اور زیادہ زرمبادلہ بھیجنے والے پاکستانیوں کو خاندان کے ساتھ شمالی علاقہ جات میں سیروتفریح کا پیکیج بھی دیا جائے۔وزیراعظم عمران خان نے معاون خصوصی برائے اوورسیز پاکستانی زلفی بخاری کو تجاویز کا جائزہ لینے کی ہدایت کر دی ہے۔واضح رہے کہ پی ٹی آئی حکومت اوورسیز پاکستانیوں کو زیادہ سے زیادہ سہولیات فراہم کرنے کاعزم ظاہر کرچکی ہے اور موجودہ تجاویز بھی اسی سلسلے کی کڑی ہے ۔