اسلام آباد(مانیٹرنگ ڈیسک) وزیراعظم نے مہمند ڈیم کا سنگ بنیاد رکھ دیا۔ نجی ٹی وی کے مطابق دریائے سوات پر منڈا ہیڈ ورکس کے مقام پر واقع مہمند ڈیم کے سنگ بنیاد کی تقریب میں سابق چیف جسٹس پاکستان جسٹس (ر) ثاقب نثار، آرمی چیف جنرل قمر جاوید باجوہ، چیئرمین واپڈا سمیت دیگر نے شرکت کی۔پشاور سے 37 کلو میٹر شمال کی جانب ضلع مہمند میں واقع مہمند ڈیم میں مجموعی طور پر 12 لاکھ ایکڑ فٹ پانی ذخیرہ کرنے کی گنجائش ہے جس کی کل تعمیری
لاگت 291 ارب روپے ہے۔ڈیم کی اونچائی 213 میٹر یعنی 698.82 فٹ بلند ہوگی جس میں تقریباً 800 میگاواٹ بجلی پیدا کرنے کی صلاحیت ہوگی۔ 16 ہزار 667 ایکڑ بنجر زمین کاشت کے قابل ہو سکے گی۔ڈیم کی تعمیر سے ضلع چار سدہ اور نوشہرہ کے زیادہ تر علاقے موسمی سیلاب سے محفوظ ہو جائیں گے۔ مہمند ڈیم کا منصوبہ 2024 تک تیار ہوجائے گا۔ یاد رہے کہ سابق چیف جسٹس ثاقب نثار کی ہدایت پر ڈیم فنڈ قائم کیا گیا تھا جس میں اب تک اربوں روپے جمع ہو چکے ہیں۔
