اسلام آباد (نیو زڈیسک )1985 ءمیں اس وقت کے سوویت یونین کے سربراہ گورباچوف اور امریکی صدر رونالڈ ریگن نے ایک اچھوتے خیال کو عملی جامہ پہنانے کا منصوبہ بنایا۔ اور یہ تھا اس ذریعے سے توانائی کا حصول جو ستاروں کو اربوں برسوں سے روشن رکھے ہوئے ہے۔اس مقصد کے لیے سرد جنگ کے ان حریف ممالک یعنی سوویت یونین اور امریکا کے علاوہ دیگر ممالک نے باہمی تعاون کا فیصلہ کیا تاکہ مستقبل میں توانائی کی ضروریات کو پورا کیا جا سکے۔ بڑی مقدار میں یہ توانائی دراصل نسبتاً محفوظ طریقے سے حاصل کی جانی تھی جسے فیوڑن کا نام دیا جاتا ہے۔اس فیصلے کو آج 30 برس ہو چکے ہیں مگر یہ خواب ابھی تک شرمندہ تعبیر نہیں ہو سکا۔ بنیادی فیصلے کے بعد کئی برسوں کی کوششوں کے بعد 2006ءمیں بالآخر شروع ہونے والا ’انٹرنیشنل تھرمو نیوکلیئر ایکسپیریمنٹن ری ایکٹر‘ (ITER) نامی منصوبہ ابھی تک نا مکمل ہے۔ ابتدائی طور پر اس منصوبے کی لاگت کا تخمینہ پانچ بلین یورو لگایا گیا تھا مگر اب یہ اندازہ 15 بلین یورو تک پہنچ چکا ہے۔تاہم رواں برس مارچ میں چارج سنبھالنے والے اس منصوبے کے نئے ڈائریکٹر جنرل بیرنار بیگو کا کہنا ہے کہ ان کی پوری کوشش ہو گی کہ اگلے چار برسوں میں اس منصوبے کی آزمائش ممکن ہو سکے گی۔ کیونکہ اب اس منصوبے کے پارٹنر کو اس بات کا ادراک ہو گیا ہے کہ توانائی کے حصول کے اس اہم منصوبے کو پایہ تکمیل تک پہنچنا چاہیے۔ 65 سالہ بیگو لمبے عرصے تک فرانس کے اٹامک انرجی کمیشن (CEA) کے سربراہ رہے ہیں۔ ان کا کہنا تھا کہ اس حوالے سے سب سے بڑی رکاوٹ 28 رکنی یورپی یونین، امریکا اور روس کی جانب مشترکہ فیصلہ سازی میں آنے والی تاخیر ہے۔ITERکی ایک ذمہ داری ایک ایسے تجرباتی لیبارٹری کی تیاری ہے

جس میں یہ دیکھا جا سکے کہ آیا فیوڑن اس صدی کی توانائی کی ضروریات پوری کرنے کے لیے ایک حقیقی ذریعہ بن بھی سکتی ہے یا نہیں۔فیوڑن دراصل ایک ایسا عمل ہے جس میں کم ایٹمی وزن رکھنے والے عناصر کے نیوکلیئس کو بہت زیادہ درجہ حرارت پر اس طرح ملایا جاتا ہے کہ اس کے نتیجے میں زیادہ ایٹمی وزن والے عناصر وجود میں آتے ہیں اور اس سارے عمل کے دوران توانائی کی بہت زیادہ مقدار پیدا ہوتی ہے۔غیر معمولی حجم کی لیبارٹری کا وزن 23000 ٹن ہو گا یعنی آئیفل ٹاور سے تین گنا زیادہ غیر معمولی حجم کی لیبارٹری کا وزن 23000 ٹن ہو گا یعنی آئیفل ٹاور سے تین گنا زیادہ نیوکلیئر فیوڑن کا عمل دراصل نیوکلیئر فِشن کے بالکل بر عکس ہے۔ فشن کا طریقہ دراصل ایٹمی توانائی کے حصول کے لیے استعمال کیا جاتا ہے جس میں بھاری عناصر کو چھوٹے عناصر میں توڑا جاتا ہے اور اس عمل کے دوران بھی بہت زیادہ توانائی خارج ہوتی ہے۔ تاہم فشن پراسیس میں ایک قباحت یہ ہے کہ کسی حادثے کی صورت میں ایک تو یہ بہت خطرناک ثابت ہو سکتا تو دوسرا مسئلہ اس پراسیس کے بعد پیدا ہونے والے تابکار مادے کو ٹھکانے لگانا بھی ہوتا ہے جو طویل عرصے تک خطرات کا باعث بنا رہتا ہے۔طویل تاخیر کے بعد اب فرانس کے جنوبی حصے میں اس تجرباتی لیبارٹری کے لیے درکار ضروری عمارات پر کام جاری ہے۔ مرکزی عمارت جسے ’ٹوک ماک‘ کا نام دیا گیا ہے وہ 2018ءمیں مکمل ہو گی جبکہ تمام 39 عمارات 2022ءتک پایہ تکمیل تک پہنچ سکیں گی۔روسی زبان سے لیے گئے لفظ ٹوک ماک نامی یہ لیبارٹری بذات خود ایک غیر معمولی حجم کی لیبارٹری ہے جس کا وزن 23000 ٹن ہو گا یعنی آئیفل ٹاور سے تین گنا زیادہ وزن کی حامل۔بیرنار بیگو کے مطابق، ”مشکلات تو ہیں مگر ہمارا مکمل یقین ہے کہ نیوکلیئر فیوڑن پر کی جانے والی سرمایہ کاری فائدہ مند ثابت ہوگی“۔