اسلام آباد (این این آئی)حکومت نے پی آئی اے کے خسارے سے متعلق تفصیلات سینٹ میں پیش کر دیں۔ جمعرات کو ایو ی ایشن ڈویژن کی جانب سے سینٹ میں تحریری جواب میں بتایا کہ قومی ائیر لائن کو یومیہ 10 کروڑ روپے خسارے کا سامنا ہے۔
ایوی ایشن ڈویژن نے بتایا کہ پی آئی اے کے قرضوں پر ماہانہ 2 ارب روپے تک سود بڑھ رہا ہے۔ ایوی ایشن ڈویژن نے کہاکہ پی آئی اے کے بڑے اخراجات میں ایندھن اور جہازوں کی مرمت شامل ہے۔ بتایا گیاکہ جہازوں کی لیزنگ لاگت بھی مجموعی اخراجات میں شامل ہوتی ہے۔ بتایاگیا کہ گزشتہ دس سال میں 5 ائیرلائنز کو لائسنس جاری کئے گئے۔وزارت برائے تجارت اینڈ ٹیکسٹائل کی جانب سے ایوان کوبتایاگیا کہ 2017ء میں ایران کے ساتھ تجارت کا حجم 93کروڑ 70لاکھ ڈالر رہا ۔ ایوان کوبتایاگیا کہ 2018ء میں ایران کے ساتھ باہمی تجارت کا حجم 1ارب 10کروڑ ڈالر رہا۔ وزیر مملکت علی محمد خان نے کہاکہ میرا پروگرام اچھی خبریں سنانے کا ہے ۔ علی محمد خان نے کہا کہ سری لنکا کے ساتھ تجارت میں اضافہ ہوا ہے۔ علی محمد خان نے کہا کہ سری لنکا سے چائے آتی ھے اور اکتیس فیصد ایکسپورٹ میں اضافہ ہوا ہے ۔ علی محمد خان نے کہا کہ سری لنکا سے چائے اور مصالحہ جات منگوائے جاتے ہیں۔ انہوں نے کہاکہ کابینہ کو اسلام آباد ایئرپورٹ کا نام قائداعظم کے نام پر رکھنے کی تجویز دی ہے۔ وزیرمملکت پارلیمانی امور علی محمد خان نے کہاکہ پی آئی اے کی پروازوں پر ریفرشمنٹ ختم نہیں کر سکتے۔
