اسلام آباد(مانیٹرنگ ڈیسک)ریاست مدینہ میں سود نہیں ہو گا ، حکومت بلاسود بینکاری کو فروغ دیگی جس کے بعد سود کے خاتمے کی طرف بڑھیں گے، وفاقی وزیر مذہبی امور نور الحق قادری کی اسلامی نظریاتی کونسل کے اجلاس کے بعد میڈیا سےگفتگو۔ تفصیلات کے مطابق وفاقی وزیر برائے مذہبی امور نور الحق قادری نے اسلامی نظریاتی کونسل کے اجلاس کے بعد میڈیا سے
خطاب کرتے ہوئے پاکستان سے سودی نظام کے بتدریج خاتمے کا اعلان کیا ہے۔ ان کا کہنا تھا کہ ریاست مدینہ میں سود نہیں ہوگا اور ہم پہلے بلاسود بینکاری کو فروغ دیں گے جس کے بعد سود کے خاتمے کی طرف بڑھیں گے۔ میڈیا سے بات کرتے ہوئے نور الحق قادری کا کہنا تھا کہ پہلے مرحلے میں بلاسود بینکاری کی حوصلہ افزائی کی جائے گی۔نورالحق قادری نے کہا کہ وزیراعظم اورحکومت کی خواہش ہے کہ اسلامی نظریاتی کونسل سےبھرپورفائدہ اٹھایا جائے، اس ادارے کو ماضی کی طرح غیرفعال ہونے سے بچائیں گے اور حکومت اسلامی نظریاتی کونسل کی تجاویز سے بھرپور فائدہ اٹھائے گی۔وزیر مذہبی امور کا کہنا تھا کہ اسلامی نظریاتی کونسل اہم آئینی ادارہ ہے، وزیراعظم عمران خان کونسل کے چیئرمین اور ممبران سے ملاقات کریں گے، ہماری حکومت کونسل سے رہنمائی چاہے گی اور قابل عمل سفارشات پر فوری عمل کرنا چاہتے ہیں۔پاکستان کو ریاست مدینہ کی طرز پر ڈھالنے کیلئے اسلامی نظریاتی کونسل کی سفارشات چاہئیں۔ اس موقع پر چیئرمین اسلامی نظریاتی کونسل ڈاکٹر قبلہ ایاز کا کہنا تھا کہ نجی سود کے خاتمے کے لیے قانون سازی کا مرحلہ مکمل ہو گیا اور اب قتل کے فتوے دینے والوں کے خلاف سزا بڑھانے کی کوشش کریں گے۔ چیئرمین اسلامی نظریاتی کونسل کا کہنا تھا کہ اسلامی نظریاتی کونسل کے مشاورتی ادارے کے طور پر فعال ہونے سے ملک میں مذہبی منافرت اور افرا تفری دور ہوگی۔انہوں نےکہا کہ کونسل اجلاس میں وزراء کی شرکت حکومت کی سنجیدگی کا مظہر ہے۔
