اسلام آباد (آئی این پی )قائد حزب اختلاف میاں محمد شہباز شریف نے اسپیکر قومی اسمبلی سے ان کے چیمبر میں ملاقات کی ۔ملاقات میں مسلم لیگ(ن) کے اراکان قومی اسمبلی رانا تنویر، مرتضی جاوید عباسی اورچوہدری بشیر ورک بھی موجود تھے ۔میاں محمد شہباز شریف نے اسپیکر قومی اسمبلی اسد قیصر کو ایوان کی کاروائی غیر جانبدارانہ طریقے سے چلانے پر مبارک باد پیش کی ۔
اس دوران شہباز شریف نے کہاکہ آپ پارٹی سیاست سے بالا تر ہو کر ایوان کی کاروائی چلا رہے ہیں جس سے پارلیمان کا وقار بلند ہوا ہے، میر ی پوری جماعت اور اس کے ارکان آپ کے بحیثیت سپیکر کے کردار کو سراہتے ہیں جبکہ اس دوران اسپیکر قومی اسمبلی نے کہاکہ میں پورے ایوان کا اسپیکر ہوں اور بلاامتیاز، آئین اور قواعد کی روشنی میں ایوان چلانا میرے منصب کا تقاضہ ہے،میر ی خواہش ہے کے احسن انداز اور ایک دوسرے کو برداشت کرتے ہوئے ایوان کی کاروائی چلتی رہے، اسد قیصر نے کہاکہ عوام نے اپنے مسائل حل کرنے کے لیے ہمیں اس ایوان میں بھیجا ہے اور ہمیں اس کی پاسداری کرنا ہو گی،میں امید کرتا ہوں کہ حزب اختلاف اپنا پارلیمانی کردار ادا کرتے ہوئے ایوان کی کاروائی چلانے میں معاون ثابت ہو گی، بعدازاں مولانا عبدالواسع کی قیادت میں متحدہ مجلس عمل کے وفد نے بھی اسپیکر قومی اسمبلی سے ملاقات کی ،ایم ایم اے کے وفد میں زاہد اکرم خان درانی اور مولانا صلاح الدین ایوبی شامل تھے۔ ملاقات میں موجودہ سیاسی اور پارلیمانی امور پر تبادلہ خیال کیا گیا۔ وفد نے اسپیکر کے غیر جانبدارانہ طریقے سے ایوان چلانے کو سراہا۔
