لاہور (مانیٹرنگ ڈیسک) لاہور کی قومی اسمبلی کی 14 نشستوں کے سرکاری نتائج جاری کر دیے گئے ہیں، ان نتائج کے مطابق ن لیگ کا لاہور پر قبضہ قائم ہے، پاکستان مسلم لیگ (ن) 14 نشستوں میں سے 10 نشستیں حاصل کرنے میں کامیاب رہی ہے جبکہ تحریک انصاف کے حصے میں لاہور سے 4 نشستیں آئی ہیں،
لاہور کے حلقے این اے 131 میں عمران خان اور خواجہ سعد رفیق کا انتہائی کانٹے دار مقابلہ ہوا جس میں عمران خان کامیاب رہے جبکہ تحریک انصاف نے دیگر تین حلقوں میں کامیابی حاصل کی، لاہور کے حلقہ این اے 126سے حماد اظہر، این اے 130سے شفقت محمود اور این اے 135 سے تحریک انصاف کے ملک کرامت کھوکھر کامیاب رہے۔ دوسری جانب لاہور کے حلقہ این اے 132 میں ن لیگ کے صدر شہباز شریف کامیاب رہے، انہوں نے 95 ہزار 835 ووٹ حاصل کیے جبکہ ان کے مدمقابل تحریک انصاف کے امیدوار منشا سندھو نے 49 ہزار 93 ووٹ حاصل کیے، مسلم لیگ کی جانب سے دیگر نو نشستوں پر جو امیدوار کامیاب ہوئے ان میں حلقہ این اے 123سے محمد ریاض، این اے 124سے حمزہ شہباز، این اے 125سے وحید عالم خان، این اے 127 سے علی پرویز ملک، این اے 128سے روحیل اصغر، این اے 129 سردار ایاز صادق، این اے 133سے پرویز ملک، این اے 134سے رانا مبشر اور این اے 136سے افضل کھوکھر شامل ہیں۔ واضح رہے کہ تحریک انصاف اب تک کے موصول ہونے والے نتائج کے مطابق قومی اسمبلی میں برتری حاصل کئے ہوئے ہے اور حکومت بنانے کی پوزیشن میں ہے جبکہ صوبہ پنجاب اور صوبہ خیبرپختونخوا میں بھی تحریک انصاف کی حکومت بنتی نظر آ رہی ہے۔
