اسلام آباد (مانیٹرنگ ڈیسک) پاکستان تحریک انصاف کے رہنما فواد چوہدری اور پاکستان مسلم لیگ نواز کے رہنما طلال چوہدری نے ایک دوسرے کے خلاف نازیبا الفاظ کا استعمال کیا۔یہ واقعہ نجی ٹی وی ’’جیو نیوز‘‘کے پروگرام’’کیپیٹل ٹاک‘‘ میں پیش آیا جس کے دوران پروگرام کے میزبان حامد میرمسلسل دونوں رہنمائوں کو روکتے رہے تاہم وہ نہیں رکے۔طلال چوہدری نے چیئرمین تحریک انصاف
کی مبینہ ناجائز بیٹی ٹیرن وائٹ کے حوالے سے جب بات شروع کی اور عمران خان اور ان کی مبینہ ناجائز بیٹی ٹیرن وائٹ کے ڈی این اے کروانے کا مطالبہ کیا تو فواد چوہدری نے بھی اس موقع پر نازیبا الفاظ اور غیر پارلیمانی گفتگو شروع کرتے ہوئے طلال چوہدری کو ناجائز قرار دیدیا۔ فواد چوہدری نے کہا کہ ’بتائو فیصل آباد کے فاروق خان کے تم کیا لگتے ہو، وہ تمہارا کون ہے، اپنا بھی ڈی این اے کروائو، تم کس کی اولاد ہو‘۔ حامد میر اس موقع پر دونوں سیاستدانوں کو غیر پارلیمانی گفتگو کرنے سے روکتے رہے تاہم دونوں ان کی بات سنی ان سنی کرتے ہوئے مسلسل ایک دوسرے پر گھٹیا الزامات عائد کرتے رہے۔ اسی پروگرام میں شریک پاکستان پیپلز پارٹی کے رہنما مولا بخش چانڈیو نے پی ٹی آئی اور ن لیگ کے رہنمائوں کی طرف سے نازیبا الفاظ کی مذمت کی۔انہوں نے کہا کہ یہ دونوں اپنے سیاسی قائدین کی وجہ سے یہ رویہ اختیار کیے ہوئے ہیں۔ ان کا کہنا تھا کہ سیاست دانوں کو ایک دوسرے کے لیے نازیبا الفاظ استعمال کرنے سے گریز کرنا چاہیے۔خیال رہے کہ یہ ن لیگ اور پی ٹی آئی کے رہنمائوں کے درمیان یہ پہلا تلخ واقعہ نہیں۔اس سے قبل مختلف نجی پروگراموں میں ن لیگ اور تحریک انصاف کے رہنمائوں کے درمیان نوک جھونک ہوتی رہی ہے جبکہ نجی ٹی وی جیو نیوزکے ہی پروگرام آپس کی بات میں پی ٹی آئی رہنما نعیم الحق نے ن لیگ کے دانیال عزیز کو تھپڑ دے مارا تھا۔
