اسلام آباد (نیو زڈیسک )بالی ووڈ اسٹار سلمان خان کے جیل جانے پر پاکستان کے سابق فاسٹ بولر شعیب اختر سب سے زیادہ پریشان ہیں اور انہوں نے سلمان خان کو جودھ پور عدالت کی طرف سے ملنے والی پانچ سال قید کی سزاکوانتہائی سخت قراردیا ہے۔شعیب اختر،سلمان خان کے گہرے دوست ہیں اور انہوں نے سوشل میڈیا کے ذریعے سلمان خان کے جیل جانے پر افسوس کا اظہار کرتے ہوئے لکھا ہے کہ قانون کے اپنے راستے ہیں

اور ہمیں ہرحال میں قانون کا احترام کرنا چاہیے۔لیکن اس کے باوجود وہ سمجھتے ہیں کہ یہ سزابہت سخت ہے۔وہ سلمان کے خاندان کے ساتھ ہیں اور امیدرکھتے ہیں کہ وہ بہت جلد باہر آجائیں گے۔شعیب اخترکی سلمان خان کے لیے پسندیدگی کا اندازہ اس بات سے لگایا جا سکتا ہے کہ ایک مرتبہ انہوں نے اپنے ایک انٹرویو میں اس خواہش کا اظہار کیا تھا کہ اگر ان کی زندگی پر کوئی فلم بنتی ہے تو وہ چاہیں گے کہ اس میں شعیب اختر کا کردار سلمان خان ادا کریں۔سلمان خان کو گزشتہ روز جودھ پور کی عدالت نے 20سال قبل بھارتی ریاست راجستھان کے علاقے جودھ پور میں فلم ’’ہم تم ساتھ ساتھ ہیں‘‘ کی شوٹنگ کے دوران نایاب کالے ہرنوں کا شکار کرنے کے الزام میں پانچ سال قید کی سزاسنائی تھی جس کے بعد انہیں جیل بھیج دیا گیا تھا۔