کراچی (نیوزڈیسک) ویسٹ انڈیز کے خلاف دوسرے ٹی ٹوئنٹی انٹر نیشنل میچ میں پاکستان کے لیگ اسپنر شاداب خان کو نازیبا کلمات کہنے کی پاداش میں میچ ریفری نے جرمانہ عائد کر دیا ۔نیشنل اسٹیڈیم کراچی پر پیر کو کھیلے گئے
دوسرے ٹی ٹوئنٹی میچ کے دوران نےویسٹ انڈیز کے بیٹسمین چڈوک والٹن کو آؤٹ کرنے کے بعد نازیبا اشارہ کرنے کے ساتھ ساتھ نازیبا کلمات بھی ادا کیے ۔جس کا آئی سی سی کے میچ ریفری ڈیوڈ بون نے سخت نوٹس لیا اورمعمول کی سماعت کے بعد آرٹیکل 2.1.7 کی خلاف وزری پر میچ فیس کا 20فیصد جرمانہ عائد کرنے کے ساتھ ساتھ ایک ڈیمرٹ پوائنٹ بھی دیا ۔آئی سی سی قوانین کے مطابق اگر شاداب خان نے اگلے دوسال میں مزید تین ڈیمرٹ پوائنٹس لے لیے تو ان پر ایک ٹیسٹ میچ ،دو ون ڈے انٹر نیشنل یا دو ٹی20انٹر نیشنل میچوں کی پابندی بھی لگائی جاسکتی ہے۔واضح رہے کہ ویسٹ انڈیز اور پاکستان کے دوسرے ٹی ٹوئنٹی میچ میں چیڈوک والٹن 40سکور بنا کر کریز پر موجود تھے کہ شاداب خان نے انہیں کلین بولڈ کردیا ،اس کے بعد شاداب خان نے والٹن کی طرف ہاتھ سے اشارہ کیا اور نازیبا الفاظ ادا کیے۔شاداب خان کی گالی پر پردہ ڈالتے ہوئے کمنٹیٹر وسیم اکرم نے مزاحیہ انداز میں بات کرتے ہوئے کہا کہ شاداب خان کرکٹ کا چینی نام بتا رہے تھے۔وسیم اکرم کی یہ بات سن کر رمیض راجہ بھی ہنس پڑے۔
