کراچی (آئی این پی)پی ایس ایل 3میں اسلام آبادیونائیٹڈ کیلئے شاندار کارکردگی دکھاکرپاکستان ٹیم میں جگہ پانے والے 22سالہ آل رائونڈر حسین طلعت نے کراچی میں ویسٹ انڈیز کے خلاف اپنے ٹی ٹوئنٹی ڈیبیو میں اہم عالمی ریکارڈ برابرکرنے کے ساتھ ساتھ تین اہم اعزازات اپنے نام کرلئے ہیں۔ 22سالہ آل رائونڈر حسین طلعت نے ویسٹ انڈیزکے خلاف سیریزکے پہلے میچ میں اوپنر آندرے فلیچر، کپتان جیسن محمد اور ریادایمرٹ کے کیچز تھام کر ٹی ٹوئنٹی20ڈیبیومیں زیادہ کیچ تھامنے کا عالمی ریکارڈ برابر کردیا۔

دنیا کا کوئی بھی کھلاڑی کیریئر کے پہلے ٹوئنٹی20انٹرنیشنل میچ میں اس سے زائدکیچ نہیں تھام سکاہے۔ پاکستان کی ہسٹری کے محض تیسرے کرکٹر ہیں جنہیں کیریئر کے پہلے ہی ٹوئنٹی20انٹرنیشنل میچ میں بہترین کھلاڑی کا ایوارڈ پانے کا اعزاز حاصل ہوا۔اس سے قبل یہ کارنامہ صرف شاہد آفریدی 2006 میں اور شاداب خان 2017میں سرانجام دے سکے تھے۔ حسین طلعت نے کیریئر کے پہلے ٹوئنٹی20انٹرنیشنل میچ میں 37 گیندوں پر دو چوکوں اور ایک چھکے کی مددسے 41رنز بنائے جو ٹی ٹوئنٹی ڈیبیومیں کسی بھی پاکستانی کرکٹرکے تیسرے زیادہ رنز ہیں۔تاحال پاکستان کی ہسٹری میں صرف دو کھلاڑیوں نے اپنے پہلے ٹوئنٹی20انٹرنیشنل میچ میں اس سے زائد رنزبنائے ہیں جن میں عمرامین نے 2013 میں ویسٹ انڈیزکے خلاف 47جبکہ 2006 میں محمدحفیظ نے پاکستانی تاریخ کے اولین ٹی ٹوئنٹی انٹرنیشنل میچ میں انگلینڈکے خلاف46رنزبناکریہ اعزاز پایاتھا۔