اسلام آباد (مانیٹرنگ ڈیسک) چھ سالہ حسن اختر کی باؤلنگ نے ایک طرف لوگوں کے دل جیتے تو دوسری طرف وسیم اکرم بھی اس بچے میں ٹیلنٹ کو دیکھ کر حیران رہ گئے، واضح رہے کہ سوشل میڈیا پر چھ سالہ حسن اختر کی باؤلنگ سوشل میڈیا پر وائرل ہوئی جسے دیکھتے ہی وسیم اکرم نے اس بچے کو ڈھونڈنے کی ہدایت کی، جب میڈیا اس چھ سالہ بچے کے گھر پہنچا تو اس نے سوئنگ کے بادشاہ وسیم اکرم سے باؤلنگ سیکھنے کی خواہش کا اظہار کیا جس پر وسیم اکرم نے بچے کو باؤلنگ ٹپس دینے
کا وعدہ کر لیا۔ پاکستان کے معروف باؤلر وسیم اکرم نے حسن اختر کو باؤلنگ ٹپس دینے کا اپنا وعدہ پورا کردیا، سماجی رابطے کی ویب سائٹ ٹوئٹر پر وسیم اکرم نے چھ سالہ حسن اختر کے ساتھ ایک تصویر شیئر کی ہے جس میں وسیم اکرم ننھے باؤلر کو باؤلنگ کی ٹپس دے رہے ہیں، حسن اختر پاکستان کی شرٹ میں ملبوس ہیں اور غور سے وسیم اکرم کی بات سن رہے ہیں، اس تصویر کے ساتھ وسیم اکرم نے اپنے پیغام میں کہا کہ چیچہ وطنی کے ننھے حسن کے ساتھ معیاری وقت گزار کر بہت مزہ آیا۔
