شارجہ (این این آئی)پاکستان سپر لیگ کے رواں سیزن میں اب تک سب سے زیادہ رنز بنانے والے سری لنکا کے سابق کپتان کمارسنگاکارا نے کہا ہے کہ لیگ کے مقابلوں کا معیار بہت اونچا ہے ٗ شعیب ملک نے کھلاڑیوں پر کبھی دباؤ نہیں ڈالا۔ ایک انٹرویو کے دوران سنگاکارا نے کہا کہ پاکستان سے عظیم باصلاحیت نوجوان کھلاڑیوں کے ساتھ ساتھ دنیا کے چند بہترین کھلاڑی حصہ لے رہے ہیں اور سینئر کھلاڑی بھی وہاں موجود ہیں۔
اس لیے میں سمجھتا ہوں کہ یہ بہترین لیگز میں سے ایک ہے۔ملتان سلطانز کے کپتان شعیب ملک کی تعریف کرتے ہوئے انھوں نے کہا کہ کپتان نے کھلاڑیوں پر کبھی دباؤ نہیں ڈالا۔شعیب ملک کے حوالے سے انھوں نے کہا کہ وہ ایک اچھے قائد ہیں کیونکہ وہ بہت تحمل مزاج ہیں اور وہ کبھی بھی دباؤ نہیں ڈالتے لیکن ہم سے اسی کی توقع کرتے ہیں جس کا تقاضا ہوتا ہے۔ملتان سلطانز کی فائنل تک رسائی کی صورت میں پاکستان آنے کے حوالے سے انہوںنے کہاکہ میرے خیال میں فائنل تک جانے سے قبل ہمارے پاس بہت وقت ہے اور یہ صرف ایک میچ کھیلنے کا معاملہ ہے اور وقت آنے پر فیصلہ کریں گے۔عمران طاہر کی گزشتہ میچ میں ہیٹ ٹرک کی تعریف کرتے ہوئے ان کا کہنا تھا کہ میرے خیال میں یہ غیرمعمولی تھی۔سنگاکارا نے کہا کہ جس طرح عمران طاہر باؤلنگ کرتے ہوئے اس سے آدمی کے معیار کا اظہار ہوتا ہے اسی لیے انھیں دنیا کے بہترین باؤلرز میں سے ایک گردانا جاتا ہے۔عمران طاہر کے کھیل کی تعریف کرتے ہوئے انھوں نے کہا کہ یہ ان کے کنٹرول اور شعور کا مظہر ہے، درحقیقت وہ سب کچھ کرتے ہیں اور ان کے ساتھ کھیلنا ایک خوشی کی بات ہے۔
