قصور(نیوز ڈیسک) ڈسٹرکٹ کوارڈی نیشن آفیسر قصور زیرصدارت گندم خریداری مہم2015ءاورباردانہ کی تقسیم کا جائزہ لینے کے حوالے سے اجلاس ڈی سی اوکمیٹی روم میں منعقدہوا۔ اجلاس میں محمدشاہد‘محکمہ خوراک‘سیکرٹریز مارکیٹ کمیٹی‘ محکمہ پولیس اور دیگرمحکموں کے افسران نے شرکت کی۔ اجلاس میں ڈی او سی چوہدری محمد رفیق نے گندم خریداری اور باردانہ کی تقسیم کے حوالے سے پنجاب حکومت کی طرف سے جاری کردہ حکمت عملی پرروشنی ڈالی اوربتایا کہ گندم سرکاری ریٹ 1300 روپے فی من کے حساب سے خریدی جائیگی اور فی بوری 100کلوگرام کے ڈلیوری چارجز 7روپے 50پیسے کے حساب سے دیئے جائینگے۔ ضلع قصور میں گندم کی خریداری کا ہدف 95ہزار میٹرک ٹن مقرر کیا گیا ہے اور باردانہ کی تقسیم 15 اپریل سے شروع ہوگی جبکہ 20 اپریل2015ءسے تمام سینٹرزگندم کی خریداری شروع کردی جائیگی۔ مزید بتایا گیا کہ ضلع بھرمیں 14 گندم خریداری سینٹرز قائم کئے گئے ہیں جن میں قصور‘ کھڈیاں ‘عثمان والا‘ چونیاں‘پتوکی ‘حبیب آباد‘ بیدیاں‘ تلونڈی‘ الہ آباد‘ شام کوٹ‘ کنگن پور‘ سرائے مغل‘پھولنگر اور کوٹرادھاکشن شامل ہے۔ اس موقع پر ڈی سی او نے کہاکہ گندم خریداری سینٹرز پرزمینداروںکو تمام سہولیات دی جائے گی اورضلع بھر سے گندم خریداری ہدف ہر صورت ممکن بنایا جائے گا۔