لاہور ( این این آئی) فلمسٹار میرا نے کہا ہے کہ مرتے دم تک دکھی انسانیت کی خدمت کرتی رہوں گی ، سیاست سے کوئی دلچسپی نہیں صرف ایک خواب ہے کہ مجھے ایک ایسا پلیٹ فارم مل جائے جس کے تحت میں دکھی انسانیت کی خدمت کروں ۔ انہوں نے ’’ا ین این آئی‘‘ سے خصوصی گفتگو کرتے ہوئے کہا کہ عمران خان ، شہزاد رائے ، ابرار الحق اور جواد احمد سمیت بے شمار لوگ ایسے ہیں جنہوں نے انسانی خدمت کا بیڑا اٹھایا اور خاص طور پر مولانا عبدالستار ایدھی کو خراج تحسین پیش

کرتی ہوں جنہوں نے اپنی ساری زندگی ضرورت مند انسانیت کے لئے وقف کر دی ۔میرا نے کہا کہ انسانیت کی خدمت کرنے والے لوگ دنیا سے جانے کے بعد بھی نہیں مرتے بلکہ اپنے کردار کے ذریعے لوگوں کے دلوں میں زندہ رہتے ہیں اور میں بھی کوئی ایسا بڑا کام کرنا چاہتی ہوں کہ لوگ میرے جانے کے بعد بھی احترام سے میرا نام لیں ۔ اس کے لئے میری جدوجہد جاری ہے ۔ ایک سوال کے جواب میں انہوں نے کہا کہ میں کہیں شفٹ نہیں ہو رہی بلکہ پاکستان میں رہ کر اپنے لوگوں کی خدمت کروں گی