کراچی(این این آئی) پاکستان کسٹم میں 30 برس بعد بھرتیاں ہوئی ہیں، 238 افراد اور 189 اہل کاروں کو تربیت کے بعد محکمہ میں شامل کرلیا گیاہے۔تفصیلات کے مطابق پاکستان کسٹم میں 30 برس سے بھرتیوں کا عمل بند تھا، اب تیس برس بعد 238 افراد کو بھرتی کرکے انہیںجدید تربیت دے کر بطور افسر
انہیں محکمہ میں تعینات کردیا گیا ہے ساتھ ہی 189 اہلکار بھی بھرتی ہوئے ہیں۔ٹریننگ کے بعد پاس آئوٹ ہونے والے ان 238 کسٹم افسران کو مختلف پیشہ ورانہ امور کی تربیت کے علاوہ عصر حاضر کے تقاضوں کے مطابق تربیت دی گئی ہے۔ممبر ایف بی آر روزی خاں برکی نے کہاکہ بین الاقوامی ماڈل کے مطابق کسٹم افسران اور اہلکاروں کی تربیت کو یقینی بنانا بہت ضروری ہے، کسٹم افران کی تربیت کے لیے سیلیبس کو بین الاقوامی ماڈل کے مطابق تیار کیا گیا۔ڈائریکٹر جنرل ٹریننگ روبینہ واسطی کے مطابق نئے افسران اور سپاہیوں کی شمولیت سے کسٹم ایڈمنسٹریشن میں مزید بہتری آئے گی اور ریونیو بھی اضافہ ہو گا۔ڈائریکٹر ٹریننگ زیبا اظہر نے بتایا کہ کسٹم کے مختلف شعبوں کے 230 افسران کے علاوہ 189 سپاہیوں نے بھی تربیتی کورس مکمل کیا ہے ، یہ ہمارے لیے خوشی اور فخر کی بات ہے کہ آج نیا خون شامل ہو رہا ہے جو مکمل طور پر قابلیت کی بنیاد پر منتخب کیے گئے، ان کی شمولیت سے ادارے میں مثبت تبدیلیاں آئیں گی۔
