اسلام آباد (مانیٹرنگ ڈیسک) عرب لیگ کے بجائے او آئی سی کا پلیٹ فارم فعال کیا جائے، سابق آرمی چیف جنرل(ر)راحیل شریف کا سعودی عرب کومشورہ۔ پاکستان کے ایک مؤقر قومی روزنامہ کی رپورٹ کے مطابق جنرل (ر) راحیل شریف نے سعودی عرب کو مشورہ دیتے ہوئے کہا ہے کہ وہ عرب لیگ جیسے علاقائی فورم کے بجائے او آئی سی جیسے بین الاقوامی پلیٹ فارم کو
استعمال کرے اور فعال بنائے۔ راحیل شریف کا موقف ہے کہ عرب لیگ کوزیادہ اہمیت دینے سے پہلے بھی سعودی عرب کو اسلامی دنیا میں تنہائی کا سامنا کرنا پڑ چکا ہے اور اب بھی اگر سعودی حکومت اس پالیسی کو جاری رکھتی ہے تو اس سے ایک بار پھر دہشتگردی سے لڑنے کے لئے تشکیل دئیے جانے والے اسلامی اتحاد کو نقصان پہنچ سکتا ہے کیونکہ او آئی سی میں سب اسلامی ممالک موجود ہیں اور اس تنظیم کو بین الاقوامی مقبولیت بھی حاصل ہے اور اگر کسی ملک میں اس حوالے سے کارروائی کے لئے اگر کسی قانونی اقدام کی ضرورت پڑتی ہے تو عرب لیگ یہ قانونی تحفظ فراہم نہیں کرسکتی۔ذرائع نے یہ بھی بتایا کہ جنرل (ر) راحیل شریف نے سعودی حکومت کو یہ بھی مشورہ دیا ہے کہ وہ اسلامی ممالک میں اپنے سفارتی مشنز کو بھی متحرک کرے تاکہ اسلامی اتحاد کی مخالفت کو غیر مؤثربنایاجاسکے اور جو حلقے اس حوالے سے اپنے تحفظات رکھتے ہیں انہیں مطمئن کیا جاسکے۔ رپورٹ کے مطابق ممکنہ طور پر تشکیل دی جانے والے اسلامی اتحاد میں بڑی تعداد میں پاکستان کے قبائلی علاقوں کے افراد کو بھرتی کیا جائے گا جس کے لئے پہلی ترجیح سعودی عرب میں مقیم افراد ہونگے۔
