اسلام آباد(مانیٹرنگ ڈیسک) آپریشن ردالفساد کے اولین شہداء لیفٹیننٹ خاور اور نائیک شہزاد شہید کی نماز جنازہ پشاور گیریژن میں ادا کر دی گئی۔ نماز جنازہ میں کور کمانڈر پشاور لیفٹیننٹ جنرل نذیر احمد بٹ اور کمانڈر آرمی ایئر ڈیفنس کمانڈ لیفٹیننٹ جنرل زاہد لطیف سمیت فوجی افسران اور جوانوں نے شرکت کی ۔شہداء کو خراج تحسین پیش کرتے ہوئے
آرمی چیف نے کہا کہ ہماری جان، ہمارا خون پاکستان کے لئے ہے۔اپنے پیغام میں سپہ سالار نے کہا کہ شہداء کی مادر وطن کیلئے قربانی کوسلام پیش کرتے ہیں، مادر وطن کی حفاظت کیلئے جان دینے سے مقدس کام کوئی نہیں۔ شہید لیفٹیننٹ خاور کی میت آبائی علاقے کوٹلی آزاد کشمیر جبکہ نائیک شہزاد شہید کی میت مانسہرہ روانہ کر دی گئی جہاں ان کی تدفین پورے فوجی اعزاز کے ساتھ ہو گی۔یاد رہے کہ گزشتہ روز دہشتگردوں کی موجودگی کی خفیہ اطلاع ملنے پر پاک فوج کے لیفٹیننٹ خاور شہاب اور نائیک شہزاد کے ہمراہ پاک فوج کے جوانوں نے آپریشن کے دوران 4دہشتگردوں کو واصل جہنم کیا تھا ۔ دہشتگردوں کے ساتھ جھڑپ کے دوران لیفٹیننٹ خاور شہاب اور نائیک شہزاد دہشتگردوں کیساتھ فائرنگ کے تبادلے میں گولیوں کی زد میں آکر شہید ہو گئے تھے۔