لاہور( نیوزڈیسک) ملک کرائم کی وجہ سے آپ یا آپ کا کوئی عزیز، دوست کبھی نہ کبھی موبائل فون سے محروم ہو چکا ہو گا اور آئے روز سمارٹ فون اور موبائلوں کی چوریوں اور فراڈ کے عجیب وغریب طریقے سامنے آ رہے ہیں۔ موبائل چوری یا ڈکیتی کی وارداتوں کی روک تھام کے لیے پاکستان ٹیلی کمیونیکیشن اتھارٹی(پی ٹی اے ) نے آئی ایم ای آئی نمبر کے ذریعے چوری شدہ فون بلاک کرنے کا طریقہ وضع کیا۔ کمپنی ہر سمارٹ فون اور موبائل کو یہ مخصوص نمبر الاٹ کرتی ہے لہٰذا نیا فون خریدتے ہی یہ نمبر کسی کاغذ پر لکھ کر محفوظ کر لیںکیونکہ اس کے چوری ہونے پر آئی ایم ای آئی کی ضرورت پڑے گی یا اپنے فون پر #06# یا #0000#*ڈائل کر کے اس کا یہ نمبر حاصل کر سکتے ہیں، خدانخواستہ کسی بھی واردات کا نشانہ بن جائیں تو سب سے پولیس میں اس کی رپورٹ درج کرانے کی سر توڑ کوشش کریں، شاید کامیاب ہو جائیں۔ رپورٹ درج ہونے کے بعد پی ٹی اے کے ٹول فری نمبر 55055-0800پہ اپنے موبائل یا سمارٹ فون چوری کی اطلاع دیجیے۔ آپ پی ٹی سی کی ای میل پر بھی یہ اطلاع بھجوا سکتے ہیں۔ کراچی کے شہریوں کو سی پی ایل سی کی سہولت بھی حاصل ہے۔ وہ اس ادارے سے بھی رابطہ کر کے موبائل چوری کی اطلاع دے سکتے ہیں۔ شکایات درج ہونے کے باوجود اگرآپ کاموبائل آپ کو نہ بھی ملے تو ان اقدامات سے یہ یقینی ہو گا کہ چور آپ کا موبائل یا سمارٹ فون آزادی سے استعمال یا فروخت نہیں کر سکتا۔ یہ عمل دقت طلب اور کچھ پیچیدہ ہے تاہم اس کا فائدہ ہوتا ہے۔ نیز بحیثیت ذمہ دار شہری ہمارا فرض ہے کہ ہر جرم کی رپورٹ درج کرائیں اور یوں جرائم کی روک تھام میں آسانی ہوتی ہے۔ مزید براں جب بھی آپ نیا خصوصاً سیکنڈ ہینڈ موبائل یا سمارٹ فون خریدیئے تو پی ٹی اے کی ویب سائٹ پہ دستیاب آئی ایم ای آئی سرچ میں اس کا نمبر ڈال کے تصدیق کر لیجیے کہ وہ چوری شدہ تو نہیں۔