اسلام آباد(مانیٹرنگ ڈیسک) بھارت ، پاکستان کی پے در پے ترقی اور کامیابیوں سے حواس باختہ ہو گیا۔ تفصیل کے مطابق بھارتی ٹی وی کی رپورٹ میں الزام عائد کیا گیا ہے کہ روس اور بھارت کی دوستی کی مثالیں پوری دنیا میں دی جاتی تھیں لیکن اب پاکستان اور چین کی اقتصادی راہداری کو دیکھ کر روس کی رال ٹپکنے لگ گئی ہے اور اس نے بھارت کے ساتھ دھوکہ کیا ہے۔

بھارتی ٹی وی کی رپورٹ میں الزام عائد کیا گیا کہ پاکستان، چین اور روس مل کر بھارت کیخلاف ایک بلاک بنا رہے ہیں اور ان تینوں ممالک کا یہ گٹھ جوڑ بھارت کیلئے انتہائی مہلک ثابت ہوگا۔ بھارتی میڈیا نے اپنی ہی حکومت کو شدید تنقید کا نشانہ بناتے ہوئے کہا کہ حکومتی پالیسیوں کے باعث بھارت دنیا بھر میں تنہائی کا شکار ہوتا جا رہا ہے۔

دوسری جانب بھارت پاکستان کے مایہ ناز میزائل ’’بابر‘‘ کے مقابلے میں تیار کئے جانے والے اپنے میزائل کی مسلسل چوتھی ناکامی پر بھی حواس باختہ ہے۔ ٹائمز آف انڈیا کی رپورٹ کے مطابق مارچ 2013 کے بعد یہ چوتھا موقع تھا جب کروز میزائل کا بھارتی تجربہ ناکام ہوا۔
رپورٹ میں کہا گیا کہ اڑیسہ کے ساحل سے دور بیلاسور کے ٹیسٹ رینج سے فائر کیا جانے والا میزائل ہوا میں ہی اپنا رْخ تبدیل کرنے کے بعد ہدف تک پہنچنے سے قبل ہی تباہ ہوگیا۔اس میزائل کا پہلا تجربہ مارچ 2013 میں کیا گیا تھا جو مکمل طور ناکام ہوا، اکتوبر 2014 میں کیے جانے والے دوسرے تجربے کو ’جزوی کامیاب‘ قرار دیا گیا، تاہم پھر اکتوبر 2015 میں تیسرا تجربہ اور اب چوتھا تجربہ بھی بْری طرح ناکام ہوا۔

موضوعات:بھارت پاکستان چین روس سی پیک