لاہور( این این آئی)جو ہرٹاؤن میں ریس لگاتی کار نے سڑک کنارے بیٹھے اسٹام فروش کو کچل ڈالا جبکہ دو افراد زخمی ہوگئے ،حادثے کے بعد کار سوار نوجوان موقع سے فرار ہو گئے ، مانگا منڈی میں ٹرالر کی ٹکر سے ایک موٹر سائیکل سوار جاں بحقاور دوسرا زخمی ہو گیا ۔بتایا گیا ہے کہ اسٹام فروش عثمان دو افراد کے ہمراہ جو ہرٹاؤن میں ایل ڈی اے پلازہ کے قریب کاؤنٹر لگا کر بیٹھا ہوا تھا کہ ریس لگاتی کاروں میں سے ایک کار نمبری LEH-1889نے تینوں کو کچل دیا جس سے عثمان موقع پر ہی دم توڑ گیا جبکہ دو افراد شدید زخمی ہو گئے جنہیں طبی امدا دکیلئے ہسپتال داخل کرا دیا گیا ۔
حادثے کے بعد کار میں سوار چار طالبعلم گاڑی کرچھوڑ کرفرار ہو گئے ۔ پولیس نے گاڑی کو قبضے میں لے کر کارروائی شروع کر دی ہے۔دوسری جانب مانگا منڈی کے علاقے میں ٹرالر کی موٹرسائیکل کو ٹکر سے ایک نوجوان جاں بحق جبکہ دوسرا زخمی ہوگیا، ریسکیو ٹیموں نے زخمی ہونے والے نوجوان کو قریبی ہسپتال منتقل کردیا۔پولیس کے مطابق حادثہ مانگا بائی پاس کے قریب پیش آیا جہاں ٹرالر نے آگے جانے والی موٹرسائیکل کو ٹکر مار دی۔
حادثے میں موٹرسائیکل سوار 16 سالہ طلحہ جاں بحق ہوگیا جبکہ اسکا ساتھی فراز زخمی ہوگیا جسے مانگا منڈی ہسپتال منتقل کردیا گیا۔پولیس کے مطابق زخمی کی حالت خطرے سے باہر ہے۔ حادثے کے بعد ٹرالر ڈرائیور موقع سے فرار ہوگیا۔
