اسلام آباد (مانیٹرنگ ڈیسک)حکومت نے پاکستانیوں سے شادی کرنے والے افغان مہاجرین کے لیے نئی ویزا پالیسی لانے کا فیصلہ کر لیا جس کی کابینہ سے جلد منظوری لی جائے گی۔وفاقی وزیر سیفران عبدالقادر بلوچ نے قومی اسمبلی کو بتایا کہ سرحد کے دونوں جانب شادی کرنے والوں کے لیے خصوصی ویزا پالیسی لائی جا رہی ہے، کابینہ سے منظوری کے بعد ایسے افراد کو ویزے جاری کیے جائیں گے۔وفاقی وزیر سیفران نے تحریری جواب میں بتایا کہ فاٹا ملک کا غریب ترین خطہ ہے، رواں مالی سال ترقیاتی بجٹ میں فاٹا کا حصہ صرف 2 ارب 19 کروڑ روپے ہے۔وفاقی وزیر تجارت خرم دستگیر نے ایوان کو بتایا کہ امریکا کے ساتھ باہمی تجارت جاری رہے گی، 2016میں تجارتی خسارہ 23 ارب 96 کروڑ ڈالر ہوگیا، بھارت سے عام طور پر خام مال یا جن اشیاء کی قلت ہو درآمد کرتے ہیں۔وزارت خارجہ نے ایوان کو بتایا کہ گزشتہ 4 سال میں سعودی عرب میں 7 ہزار 662 پاکستانی گرفتار ہوئے ، ان کی رہائی اور قانونی معاونت کے لیے اقدامات کررہے ہیں۔