لاہور( این این آئی)ایٹمی سائنسدان ڈاکٹر عبد القدیر خان نے کہا ہے کہ ملک کو درپیش سنگین مسائل کے حل کیلئے ہمیں بطور قوم اپنا کردار ادا کرنا ہوگا ، پاک چین اقتصادی راہداری پاکستان کی تقدیر بدلنے کا منصوبہ ہے لیکن ہمارے دشمن اسکے خلاف سازشوں میں مصروف ہیں۔ایک انٹر ویو میں ڈاکٹر عبد القدیر خان نے کہا کہ اللہ تعالیٰ نے پاکستان کو بے پناہ وسائل سے نوازا ہے
لیکن بد قسمتی سے ہم ان سے استفادہ نہیں کر سکے ۔ اگر یہاں اقتدار میں آنے والی حکومتیں نیک نیتی اور منصوبہ بندی سے کام کرتیں تو آج پاکستان ترقی یافتہ ممالک کی صف میں کھڑا ہوتا۔ انہوں نے کہا کہ پاکستان کا دفاع نا قابل تسخیر ہے اور ہمارا دشمن اس سے بخوبی آگاہ ہے ۔ بھارت کی طرف سے سرحدی خلاف ورزی کھلی دہشتگردی ہے ، پاکستان کو اس معاملے کو بھرپور طریقے سے عالمی برادری کے سامنے اٹھانا چاہیے ۔
