اسلام آباد(آئی این پی)وفاقی وزیرداخلہ چوہدری نثار علی خان کا ہرنیوں کاآپریشن آئندہ ہفتے پاکستان انسٹیوٹ آف میڈیکل سائنسز ( پمز) میں ہوگا،وزیرخزانہ اسحاق ڈار بھی معمول کا طبی معائنے کیلئے پمز ہسپتال پہنچ گئے۔ذرائع کے مطابق وفاقی وزیرداخلہ چوہدری نثار علی خان کو درد کی شکایت ہوئی جس پر وہ اپنا طبی معائنہ کرانے پمز ہسپتال پہنچے،جہاں ڈاکٹروں نے ان کے مکمل چیک اپ کے بعد ہرنیوں کی بیماری کی تشخیص کی اوروزیرداخلہ کو فوراً ہرنیوں کا آپریشن کرانے کی ہدایت کی،جس کے بعد وفاقی وزیرداخلہ چوہدری نثارعلی خان کا آپریشن آئندہ ہفتے میں متوقع ہے۔وزیرداخلہ چوہدری نثار علی خان کے خاندانی ذرائع نے بھی ان کی بیماری کی تصدیق کی ہے۔ذرائع کے مطابق وزیرداخلہ چوہدری نثار علی خان اپنے آپریشن سے قبل وزیراعظم نوازشریف سے ملاقات کریں گے اور قومی سلامتی کے اجلاس کے حوالے سے نجی اخبار میں چھپنے والی خبر کے حوالے سے ابھی تک ہونے والی تحقیقات سے آگاہ کریں گے۔قبل ازیں ذرائع کے مطابق وزیرداخلہ چوہدری نثار علی خان جب پمز ہسپتال اپنا معائنہ کرانے کیلئے پہنچے تو وفاقی وزیرخزانہ اسحاق ڈار وہاں پہلے سے ہی اپنا طبی معائنہ کرانے کیلئے موجود تھے تاہم ڈاکٹروں نے وزیرخزانہ اسحاق ڈار کا چیک اپ کرنے کے بعد انہیں ادوایات تجویز کرکے گھرجانے کی اجازت دے دی۔