لاہور(مانیٹرنگ ڈیسک)سابق انڈس واٹر کمشنر جماعت علی شاہ نے کہا ہے کہ بھارت پاکستان کا پانی بند کر کے کروڑوں انسانوں کاقتل عام چاہتا ہے اگر اس نے ایسا کیا تو پھر جنگ ہو گی ‘ موجودہ حکومت کو اس کیلئے پیشگی منصوبہ بندی کرنی چاہیے کہ اگر بھارت ایسا کرے تو وہ عالمی مصالحتی عدالت میں اپنا مقدمہ لے کر جائے ‘اگرچہ یہ کوئی بھی فریق یکطرفہ طور پر معاہدے کو ختم نہیں سکتا لیکن بھارت معاہدے کی سنگین خلاف ورزیاں کر کے پاکستان کو پانی کی شدید قلت سے دو چار کر سکتا ہے۔ وہ جمعرات کے روز لاہور پریس کلب میں پاکستان متحدہ کسان محاذ اور سول سوسائٹی کی مشترکہ پریس کانفرنس میں گفتگو کر رہے تھے جبکہ اس موقعہ پر پاکستان متحدہ کسان محاذ کے صدر ایوب میو ،مجاہد اللہ ترین سمیت دیگر بھی موجود تھے ۔جماعت علی شاہ نے کہا کہ بھارت پاکستان کے حصے کے دریاؤں پر ڈیموں کے منصوبے بھی شروع کر سکتا ہے اس لئے موجودہ حکومت کو اس کیلئے پیشگی منصوبہ بندی کرنی چاہیے کہ اگر بھارت ایسا کرے تو وہ عالمی مصالحتی عدالت میں اپنا مقدمہ لے کر جائے ۔ انہوں نے یہ بھی کہا کہ بھارت چناب کا پانی راوی یا بیاس میں ڈال سکتا ہے ۔ اگر اس نے ایسا کیا تو اس مسئلے پر بھی جنگ چھڑ سکتی ہے۔ انہوں نے کہا کہ بھارت کبھی بھی پاکستان کے ساتھ مخلص نہیں رہا اور اسکی کوشش رہی ہے کہ پاکستان کو معاشی طور پر تباہ کر کے خطے میں اپنی بالا دستی قائم کر ے بھارت پاکستان کا پانی بند کر کے کروڑوں انسانوں کاقتل عام چاہتا ہے اور اگر اس نے ایسا کیا تو پھر جنگ ہو گی ۔