اسلام آباد( مانیٹرنگ ڈیسک )لائن آف کنٹرول پر کشیدگی کے پیش نظر حکومت نے پی ایس او کو آئل ایمرجنسی نافذ کرنے کی ہدایت جاری کر دی ہے۔ ذرائع کا کہنا ہے کہ حکومت نے پی ایس او کو ہدایت کی ہے کہ وہ تیل کا ذخیرہ ممکنا حد تک بڑھائے اور دفاعی اداروں کو طلب کے مطابق تیل کی فراہمی یقین بنائی جائے۔پی ایس او کو جاری کی گئی ہدایت میں کہا گیا ہے کہ تیل کا غیرضروری استعمال ترک کیا جائے۔ پاک فضائیہ اور پاک آرمی کے لیے وافر مقدار میں تیل کا ذخیرہ رکھا جائے۔ واضح رہے کہ کنٹرول لائن پر آج کشیدگی کی وجہ سے پاک آرمی اور ائیر فورس ہائی الرٹ رہی۔بھارت کی بلااشتعال فائرنگ سے دو پاکستانی شہید جبکہ 10 زخمی ہو گئے۔ پاکستان کی جوابی کارروائی میں کم از کم 12 بھارتی فوجی مارے جانے کی اطلاع ہے۔ پاکستان کی بھرپور جوابی کارروائی سے بھارتی توپیں خاموش ہوگئیں تاہم کشید گی ابھی بھی برقرار ہے۔

موضوعات:پاک بھارت کشیدگی