ٹیکسلا( نیو زڈیسک) پاکستان مسلم لیگ (ن) کے مرکزی رہنما اوروفاقی وزیر داخلہ چوہدری نثار علی خان نے کہا ہے کہ بھارت پاکستان میں چھپ کر کارروائی کرسکتا ہے اور فوجی کارروائی کی بجائے کسی اور طریقےسے بھی وار کرسکتا ہے۔ہمیں چوکنا رہنا ہوگا،کسی نے ملک کی طرف میلی آنکھ سے دیکھا تو پوری قوم مقابلہ کرے گی ،ٹیکسلا میںصحافیوں سے گفتگوکرتے ہوئے وفاقی وزیرداخلہ نے کہا کہ آج اندرونی سیاست کا نہیں بلکہ بیرونی دشمن کے خلاف متحد ہونے کا وقت ہے، دشمن کا راستہ روکنے کے لیے ملک کے اندر اور باہر اتحاد کا مظاہرہ کرنا ہوگا، موجودہ صورتحال میں اتحاد اور اتفاق کا اظہار صرف بیانات سے نہیں بلکہ عملی ہونا چاہیے اور دشمن ملک کو یہ پیغام ملنا چاہیے کہ قوم کسی بھی مہم جوئی سے نمٹنے کے لیے تیار ہے۔انہوں نے کہا کہ بھارت سامنے آکر پاکستان کے مقابلے پر بھلے تیار نہ ہو لیکن چھپ کر کارروائی کرسکتا ہے اور فوجی کارروائی کی بجائے کسی اور طریقے سے بھی وار کرسکتا ہے، ہمیں اپنے گلی کوچوں میں بھی دہشت گردی روکنے کے لیے چوکنا رہنا ہوگا، جبکہ اگر کسی نے ملک کی طرف میلی آنکھ سے دیکھا تو پوری قوم مقابلہ کرے گی۔ بھارتی وزیراعظم کی تقریر پر اپنا ردعمل دیتے ہوئے ان کا کہنا تھا کہ مودی کی تقریر سے واضح ہو گیا کہ کون امن اور کون جنگ چاہتا ہے۔ میں نے آج تک کسی ملک کے سربراہ کو اس قسم کی زبان استعمال کرتے نہیں دیکھا۔ ہمسایہ ملک کی دھمکیوں سے بھی دنیا کو آگاہ کرنا چاہیے۔انہوں نے کہاکہ بھارت نے کی طرف سے ہمیں ہروقت چوکنارہناہوگا۔چوہدری نثارعلی خان نے پی پی 7میں ہونے والے ضمنی انتخابات میں اپناووٹ اپنے آبائی گائوں چکری میں کاسٹ کیا۔