اسلام آباد(مانیٹرنگ ڈیسک)پشاور میں رائیونڈ مارچ کے حوالے سے گل خان فورس تیار کر لی گئی ہے۔ گل خان فورس ڈنڈوں سے لیس ہو کر رائیونڈ مارچ کے لئے پشاور سے لاہور کی جانب روانہ ہو گی۔
تفصیلات کے مطابق مسلم لیگ نواز کی جانب سے تحریک انصاف کے مارچ کوروکنے کے لئے ڈنڈا بردار فورس، انڈہ فورس، زعیم فورس تیار کرنے کا اعلان کیا گیا تھا جس کے جواب میں پی ٹی آئی کی خواتین کی جانب سے کفن پوش فورس تیار کرنے کا اعلان کیا گیا تھا۔ تازہ ترین اطلاعات کے مطابق پی ٹی آئی پشاور نے جلسے اور دھرنے کے حوالے سے ممکنہ مزاحمت اور حکومت کی جانب سے سختی کئے جانے کے امکانات کے پیش نظر گل خان فورس تیار کر لی ہے ۔ گل خان فورس کے ممبران ڈنڈوں سے لیس ہوں گے اور تحریک انصاف کے دھرنے کے موقع پر ہر اول دستے کا کردار ادا کریں گے۔اس فورس میں ایک ہزار سے زائد ڈنڈا بردار نوجوان تیار کئے گیے ہیں ۔
