کراچی(این این آئی) وزیراعلیٰ سندھ سید مراد علی شاہ نے کہاہے کہ شہید محترمہ بے نظیر بھٹو کا خواب تھا کہ ہر غریب کا اپنا گھرہو ، میں شہید محترمہ بینظیر بھٹوکا خواب پورا کرنا چاہتا ہوں اور شہید محترمہ بینظیر بھٹو ہاؤسنگ سیل کو کارآمد بنانا چاہتا ہوں ۔ ان خیالات کا اظہارانہوں نے بدھ کو نیو سندھ سیکریٹریٹ میں شہید محترمہ بینظیر بھٹوہاؤسنگ سیل(SBBHC )سے متعلق کے اجلاس کی صدارت کرتے ہوئے کیا ۔اس موقع پر اجلاس میں ایڈیشنل چیف سیکریٹری ترقیات محمد وسیم ،چیئرمین ایس بی پی ایچ سی (SBBHC )نظیر جمالی نے بھی شرکت کی ۔انہوں نے کہاکہ میں یونین کونسل ، تعلقہ سطح تک سروے کر وا کر غریب عوام کو گھر دینے کی شکل میں مدد کرنا چاہتا ہوں ۔انہوں نے مزید کہاکہ سند ھ میں غریب عوام کی کوئی نہ کوئی مدد ہونی چاہئیے ۔ انہوں نے کہاکہ مکانات کا معیار اچھا ہونا چاہئے۔اجلاس میں وزیراعلیٰ سندھ کو بریفنگ دیتے ہوئے محمد وسیم نے بتایا کہ ڈپٹی کمشنر کے ذریعے تصدیق کر واکر یہ پلاٹس 10ہزار سے کم آمدنی والے غریبوں کو دیئے جائیں گے ۔ انہوں نے کہاکہ اب تک 5ہزار600گھر مکمل کو چکے ہیں ۔انہوں نے مزید بتا یا کہ خیر پور میں دیھ لقمان میں 80گز کے پلاٹ مارک کر لئے گئے ہیں ۔وزیر اعلیٰ سندھ نے کہا کہ ہر ضلع میں ایسے گھر بنائے جائیں جس سے غریبوں کو رہائش فراہم ہو سکے ۔انہوں نے ایڈیشنل چیف سیکریٹری محمد وسیم کو ہدایت کی کہ مزید 6ہزار گھر بنائے جائیں ۔