مظفرآباد(آئی این پی)حلقہ کھاوڑہ یونین کونسل چھتر کلاس اور یونین کونسل ڈنہ سے مسلم کانفرنس، پی پی اور تحریک انصاف کو بڑا جھٹکا، ہزاروں افرادنے سردار تسلیم عباسی کی قیادت پر اعتماد کااظہار کرتے ہوئے ان کو مسلم لیگ میں شمولیت کامشورہ دے دیا ۔ گزشتہ روز برسالہ کے مقام پر بگلوٹہ ، دھاوی، بلند کوٹ، دھانگلی، بٹنگی، برسالہ، برہان، شادرہ، پانچ میل، سایاں، بھروڑہ، ڈلی اوچھا، کے عوام کا ایک اجلاس برسالہ کے مقام پر منعقدہ ہوا جس میں طویل مشاورت کے بعد ان علاقوں کے عوام نے متفقہ طور پر اپنی اپنی جماعتوں سے مستعفی ہو کر سردار تسلیم عباسی کی قیادت پر اعتماد کااظہار کرتے ہوئے ان کو مشورہ دیا کہ وہ مسلم لیگ ن میں شمولیت اختیار کریں کیونکہ مسلم لیگ ن ہی ایک ایسی جماعت ہے جو آزادکشمیر بالخصوص کھاوڑہ، کی محرومیوں کا ازالہ کریں گے ۔ اجلاس سے راجہ سفیر خان ، راجہ لیاقت، راجہ ہارون،ثاقب عباسی، مرزا فرحت بیگ، سردارسلیم عباسی ، راحیل عباسی ودیگر نے خطاب کیاْ۔ اس موقع پر خطاب کرتے ہوئے سردار تسلیم عباسی نے کہا کہ ہم نے علاقے میں فضاء کو بہتر بنانے کے لئے ہر ممکن اقدامات کئے ۔ ہم چاہتے ہیں کہ ان علاقوں کے عوام کی احساس محرومی کو ختم کرنے کیلئے پہلے بھی کام کیا اور آئندہ بھی کام کریں گے لیکن بعض لوگوں نے ان علاقوں میں منافرت کی فضاء پیدا کردی، اور لوگوں کے ضمیر خریدنے کیلئے پیسوں کی بولیاں لگا دیں ، ان غیور عوام نے پیسوں کی سیاست کو مسترد کرتے ہوئے باوقار انداز سے جو فیصلہ کیا میں ا ن تمام علاقوں کے عمائدین کا شکریہ ادا کرتا ہوں جنہوں نے میری پیپلزپارٹی سے استعفیٰ کے بعد مجھ سے رابطہ کیا ، میں ان تمام افراد کو یقین دلاتاہوں کہ ان کے اس اعتماد کو کبھی ٹھیس نہیں پہنچاؤں گا ۔ انہوں نے کہا کہ آپ کی تجاویز کے تحت عید کے فوراً بعد برسالہ کے مقام پر ایک بڑا جلسہ منعقد کیاجائے گا جس میں آزادکشمیر و پاکستان کی مسلم لیگ ن کی مرکزی قیادت شامل ہوگی اس میں باقاعدہ شمولیت اختیار کی جائے گی ۔ انہوں نے کہا کہ آج کے فیصلے کے بعد مسلم لیگ ن کی قیادت جس کو ٹکٹ دے گی اسی کی حمایت کی جائے گی ۔