لاہور (این این آئی )پنجاب اسمبلی میں قائد حزب اختلاف میاں محمود الر شید نے کہا کہ لگتا ہے پنجاب بجٹ کی منظوری بھی ویڈیو لنک کے ذریعے ہی لی جائیگی، پنجاب پبلک سیکرٹریٹ میں راشن کی تقسیم کے سلسلہ میں منعقدہ تقریب کے دوران گفتگو کرتے ہوئے انہوں نے کہا کہ وزیراعظم کی صحت کیلئے دعاگو ہیں لیکن اب ا یسے لگ رہا ہے کہ مرکز کے بعدپنچاب کابینہ کے اجلاس ویڈیو زکانفرنسزکے ذریعے ہونگے۔ انہوں نے پنجاب کابینہ کو مخاطب کرتے ہوئے کہا کہ وہ مال روڈ پر بیٹھ کر ویڈیو لنک سے اجلاس کا انعقاد کریں تاکہ وزیر اعلیٰ کو اندازہ ہو سکے پنجاب کے عوام کس حال میں ہیں اور وہ سخت دھوپ میں اپنے جائز حقوق کیلئے سڑکوں پر ہیں۔ انہوں نے کہا کہ شہباز شریف کا لندن قیام سوالات کو جنم دے رہا ہے، انہیں فی الفور ملک واپس آکر اپنی ائینی ذمہ داریاں نبھانی چاہئیں۔ان کا کہنا ہے کہ پنجاب حکومت کی جانب سے سرکاری سکولوں کو نجی شعبے کے حوالے کیا جا رہا ہے جس سے نہ صرف تعلیم مہنگی ہو گی بلکہ اساتذہ کی نوکریاں بھی خطرے میں پڑیں گی اس لئے حکومت فوری طور پر تعلیمی اداروں کی نجکاری کا فیصلہ واپس لے۔ اپوزیشن لیڈر نے کہا کہ ماضی میں بھی رمضان ماڈل بازار عوام کو ریلیف نہیں دے سکے عوام کو حقیقی ریلیف دینے کیلئے مستحق افراد کو خصوصی کارڈ جاری کئے جائیں۔ انہوں نے کہا کہ وفاقی حکومت نے بجٹ میں ثابت کیاہے نواز لیگ ناکام لیگ ہے۔حکومت نے تیل کی قیمتوں میں ربوں ڈالرکا ریلیف حاصل کرنے کے باوجود عوام کو کوئی ریلیف فراہم نہ کیا۔ میاں محمود الرشید نے مزید کہا کہ پنجاب میں عوام ، کسان دشمن اور فراڈ بجٹ منظور نہیں ہونے دیں گے۔