کوہاٹ(آئی این پی )کوہاٹ میں تخریب کاری کا خطرناک منصوبہ ناکام بناتے ہوئے دو مبینہ دہشتگردوں سمیت 17مطلوب افراد کو گرفتار کرلیا گیا ہے۔کاروائی میں دھماکہ خیز مواد اور اسلحہ بھی قبضے میں لیا گیا ہے۔ جمعرات کو پولیس ذرائع کے مطابق کاؤنٹر ٹیررازم ڈیپارٹمنٹ کے اہلکاروں نے کوہاٹ کے علاقہ پہلوان بانڈہ میں کاروائی کرتے ہوئے دو مبینہ شدت پسندوں کو گرفتار کرلیا ہے جنکے قبضے سے دھماکہ خیز مواد اوربم بنانے کے آلات برآمد کرکے نامعلوم مقام پر منتقل کردیا گیا ہے۔پولیس کے مطابق دہشتگردوں کے قبضے سے ملنے والا دھماکہ خیز مواد بم ڈسپوذل سکواڈ کے ذریعے ناکارہ بنا دیا گیا ہے جبکہ گرفتار ملزمان کے خلاف تھانہ سی ٹی ڈی کوہاٹ ریجن میں مقدمہ درج کرلیا گیا ہے۔دریں اثناء کوہاٹ پولیس نے شہر اور مضافات کے مختلف علاقوں میں بڑے پیمانے پر کریک ڈاؤن کرتے ہوئے سنگین وارداتوں میں مطلوب پندرہ اشتہاری مجرمان انعام،اسد حکیم،واجد شاہ،مجاہد حسین،محمد جاوید،وسیم خان،شاہ فیصل،سمیع اللہ،محمد عابد،صلاح الدین،سیفور گل،محمد ابرار،عاشق اللہ،نیاز بت خان اور سکندر خان کو گرفتار کرلیا ہے۔کریک ڈاؤن کے دوران پولیس نے مختلف قسم کا ناجائز اسلحہ بھی قبضے میں لے لیا ہے جسمیں ایس ایم جی رائفلیں،بندوقیں،پستول اور مختلف بور کے کارتوس شامل ہیں۔