پشاور(نیوزڈیسک)پولیٹیکل انتظامیہ ایف آر درہ آدم خیل نے درہ بازار کے قریب ایک خفیہ اڈے پر چھاپہ مار کر بڑی تعداد میں پاکستانی اور غیر ملکی یونیورسٹیوں کی جعلی اسناد،ڈگریاں، سرٹیفیکیٹ، پاکستانی و افغانی شناختی کارڈز، اسلحہ لائسنس (منسٹری آف انٹیرئیر)کارڈ/کاپی،ڈرائیونگ لائسنس KPK،لاہور ،کراچی، اسلام آباد، نادرا کے فارم “ب”او ر سینکڑوں کی تعداد میں جعلی مہریں برآمد کرکے قبضے میں لے لیں۔موقع سے دو ملزمان اور ایک سہولت کار کو رنگے ہاتھوں گرفتار کر لیا گیا جبکہ اصلی ملزم کی جلد گرفتاری کیلئے چھاپے مارے جارہے ہیں جس میں حدودی/مشترکہ ذمہ داری کے تحت ملزمان کی 6دکانیں اور ایک عدد پٹرول پمپ بھی سیل کر دیا گیا ہے ۔ ڈپٹی کمشنر و پولیٹیکل ایجنٹ ایف آر کوہاٹ ظاہر شاہ نے پریس بریفنگ میں تفصیلات بتاتے ہوئے کہاکہ یہ کاروائی ملک میں حالیہ انسداد دہشت گردی کی کوششوں اور نیشنل ایکشن پلان کے تناظر میں کی گئی ہے۔ان کا کہنا تھا کہ ملک اور سماج دشمن عناصر کے خلاف کاروائیاں مزید تیز کی جائیں گی اور کسی کے ساتھ کوئی رعایت نہیں برتی جائے گی۔انہوں نے کہا کہ پکڑے گئے جعلی اسناد میں سرکاری اداروں، حساس اداروں، سیکورٹی فورسز، انتظامیہ، جوڈیشل، یونیورسٹیوں اور بیرون ملک سفارتخانوں کی مہریں شامل ہیں۔ انہوں نے مزید کہا کہ معاشر ے کے اندر انسان اور جرائم کا چولی دامن ساتھ ہے تاہم مربوط اور اجتماعی کوششوں کے ذریعے جرائم پیشہ عناصر کے مذموم عزائم خاک میں ملانے کیلئے بھر پور اقدامات کئے جائینگے۔ انہوں نے بروقت اور کا میاب کاروائی پر پولیٹیکل حکام کی اقدامات کو خراج تحسین پیش کیا۔ اے پی اے محمد علی اصغر،پولیٹیکل تحصیلدار سید نعمان علی شاہ اور نائب تحصیلدار فضل رحیم بھی اس موقع پر موجود تھے ۔