اسلام آباد(نیوز ڈیسک) آئی سی سی نے ورلڈ ٹی ٹوئنٹی 2016 کا شیڈول جاری کردیا جس کے مطابق روایتی حریف پاکستان اور ہندوستان کے درمیان میچ 19 مارچ کو کھیلا جائے گا۔
آئی سی سی نے جمعہ کو ایونٹ کے میزبان شہر ممبئی میں ایک تقریب کے دوران ورلڈ ٹی ٹوئنٹی مینز اور وومنز مقابلوں کا شیڈول جاری کیا.
ایونٹ کے لیے ٹیموں کو دو گروپوں میں رکھا گیا ہے، پاکستان اور ہندوستان کی خواتین اور مردوں کی ٹیموں کے درمیان میچز ایک ہی دن 19 مارچ کو کھیلے جائیں گے.
مردوں کی ٹیموں کا مقابلہ دھرم شالا میں جب کہ خواتین ٹیمیں نئی دہلی میں آمنے سامنے ہوں گی۔ہندوستان میں ہونے والے ورلڈ ٹی ٹوئنٹی 2016 میں مردوں کے 35 اور خواتین ٹیموں کے 23 مقابلوں سمیت مجموعی 58 میچز ہوں گے جو 8 مارچ سے شروع ہوں گے جب کہ دونوں فائنل 3 اپریل کو کولکتہ میں فائنل کھیلے جائیں گے۔مجموعی طور پر ٹورنامنٹ کے میچز ہندوستان کے 8 شہروں بنگلور، چنائی، دھرم شالا،کولکتہ، ناگپور، ممبئی، موہالی اور نئی دہلی میں کھیلے جائیں گے۔پاکستان گروپ 2 میں ہندوستان، آسٹریلیا، نیوزی لینڈ اورکوالیفائرگروپ اے کی فاتح ٹیم کے ساتھ شامل ہے جب کہ گروپ 1 میں سری لنکا، جنوبی افریقہ، ویسٹ انڈیز، انگلینڈ اور کوالیفائر گروپ بی کی فاتح ٹیم کو رکھا گیا ہے۔
پاکستان کا پہلا 16 مارچ کو کوالیفائر ٹیم کے ساتھ ممبئی میں ہوگا، دوسرا میچ 19 مارچ کو ہندوستان سے دھرم شالا میں، تیسرامیچ 22 مارچ کو نیوزی لینڈ کے خلاف موہالی اور 25 مارچ کو آسٹریلیا سے موہالی میں ہی ہوگا۔ورلڈ ٹی ٹوئنٹی کا آخری گروپ میچ 28 مارچ کو کھیلا جائے گا اور 29 مارچ کو تمام ٹیمیں آرام کریں گی، 30 مارچ کو پہلا سیمی فائنل نئی دہلی میں، 31 مارچ کودوسرا سیمی فائنل ممبئی میں کھیلا جائے گا، دو دن آرام کے بعد 3 اپریل کو کولکتہ میں ٹورنامنٹ کا فائنل ہوگا۔ورلڈ ٹی ٹوئنٹی کی انعامی رقم 5 کروڈ 60 لاکھ ڈالر ہے جبکہ خواتین ایونٹ کی انعامی رقم 4 لاکھ ڈالر رکھی گئی ہے جو گزشتہ دفعہ بنگلہ دیش میں ہوئے ورلڈ ٹی ٹوئنٹی سے 122 فی صد اضافی رقم ہے۔ پاکستان نے 2009 میں یونس خان کی قیادت میں ورلڈ ٹی ٹوئنٹی میں فتح حاصل کی تھی۔