اسلام آباد(نیوزڈیسک) عام آدمی پارٹی پاکستان کے چئیرمین عدنا ن رندھاوا نے تحریک ِ انصاف اور مسلم لیگ (ق) کے رہنماﺅں کی حالیہ میٹنگ کو سخت تنقید کا نشانہ بناتے ہوئے کہا کہ تحریک انصاف کب کی تحریک انصا ف(ق) بن چکی اور دونوں جماعتوں کو با ضابطہ طریقے سے ایک دوسرے میں ضم ہو جانا چاہئے۔وقت نے اس حقیقت کو ثابت کر دیاہے کہ تحریک انصاف کے پیچھے بھی وہی قوتیں کارفرما ہیں جو مسلم لیگ (ق) کو بنانے میں سرگرم تھیں ۔ یہ کوئی اتفاق نہیں تھا کہ مشرف کے وزراءکی ایک فوج تحریک انصاف میں شامل ہوئی یہ سب کچھ ایک ڈیل کا حصہ تھا۔ سازشی قوتوں کے سیاسی ایجنٹوں نے تحریک انصا ف کو تباہ کیا اور عمران خان نے نادیدہ قوتوں کے ساتھ ڈیل کر کے پاکستانی عوام کی پیٹھ میں چھرا گھونپا۔پچھلے سال کے تباہ کن دھرنے اور جاوید ہاشمی کے الزامات سے میرے موقف کی تائید ہوئی کہ تحریک انصاف اسٹبلشمنٹ کے ایجنڈے پر کام کر رہی ہے۔ دونوں پارٹیوں کی حالیہ میٹنگ اور مشترکہ ©©©”جدوجہد“ کا اعلان پاکستان کی جمہوریت کے خلاف کسی نئی سازش کا پیش خیمہ ہے۔ پاکستان کے عام آدمی کے جمہوری حقوق اور آئین کی بالا دستی کے خلاف جو بھی قوت سازشوں کا حصہ بنے گی ، ہم اسکو نہ صرف بے نقاب کریں گے بلکہ اسکی بھرپور مذمت اور مزاحمت بھی کریں گے۔