اسلام آباد (نیوز ڈیسک) روس کے علاقے سائبیریا کے شہر کیمیروو میں ایک فوجی طیارہ حادثے کا شکار ہوکر تباہ ہوگیا،
جس کے نتیجے میں جہاز میں موجود تمام افراد جان کی بازی ہار گئے۔
روسی میڈیا کی رپورٹس کے مطابق تباہ ہونے والا طیارہ اے این 12 (An-12) تھا، جس میں عملے سمیت 17 افراد سوار تھے۔
عینی شاہد کے بیان کے حوالے سے بتایا گیا ہے کہ پرواز کے دوران طیارے میں آگ بھڑک اٹھی، جس کے بعد وہ تیزی سے زمین کی جانب گرا اور زمین سے ٹکراتے ہی زور دار دھماکے سے تباہ ہوگیا۔
کیمیروو کے گورنر ایلیا سیریڈیوک نے سماجی رابطے کے پلیٹ فارم ٹیلی گرام پر واقعے کی تصدیق کرتے ہوئے بتایا کہ ضلع یاگونوو میں فضائی حادثہ پیش آیا ہے۔
گورنر کے مطابق متعلقہ حکام جائے حادثہ پر ضروری امدادی اقدامات کر رہے ہیں، جبکہ حادثے کی وجوہات معلوم کرنے کے لیے تحقیقات بھی جاری ہیں۔
دوسری جانب روسی وزارتِ دفاع کی جانب سے تاحال طیارے کے حادثے پر کوئی باضابطہ بیان سامنے نہیں آیا۔



















































