اسلام آباد (نیوز ڈیسک)مشرق وسطیٰ میں جاری کشیدگی اور خطے میں پیدا ہونے والی غیر یقینی صورتحال کے باعث عالمی مارکیٹ میں خام تیل کی قیمتوں میں ایک بار پھر اضافہ ریکارڈ کیا گیا ہے۔

غیر ملکی میڈیا کے مطابق برینٹ خام تیل کی قیمت میں 1 ڈالر 5 سینٹ کا اضافہ ہوا، جس کے بعد اس کی فی بیرل قیمت ایک فیصد اضافے کے ساتھ 108 ڈالر 68 سینٹ تک پہنچ گئی۔دوسری جانب امریکی خام تیل ویسٹ ٹیکساس انٹرمیڈیٹ (ڈبلیو ٹی آئی) کے نرخ بھی 95 سینٹ بڑھ گئے، جس کے بعد ایک بیرل کی قیمت ایک فیصد اضافے کے ساتھ 103 ڈالر 45 سینٹ ہوگئی۔رپورٹس کے مطابق دونوں عالمی بینچ مارک رواں ہفتے پہلی مرتبہ مئی کے وسط کے بعد 100 ڈالر فی بیرل سے اوپر ہفتہ وار اختتام کی جانب بڑھ رہے ہیں۔

ماہرین کے مطابق خطے میں بحری راستوں پر حملوں میں اضافے کے باعث تجارتی جہاز رانی متاثر ہونے کا خدشہ بڑھ گیا ہے، جبکہ تیل کی سپلائی میں طویل رکاوٹ کے امکانات نے عالمی مارکیٹ میں قیمتوں پر دباؤ بڑھایا ہے۔واضح رہے کہ برینٹ اور ڈبلیو ٹی آئی دونوں کی قیمتوں میں جمعرات کے روز بھی چھ فیصد سے زائد نمایاں اضافہ ریکارڈ کیا گیا تھا۔