اسلام آباد (نیوز ڈیسک) راولپنڈی میں ایک خاتون نے الزام عائد کیا ہے کہ اسے شادی کا جھانسہ دے کر بنکاک سے پاکستان لایا گیا،

جہاں ملزم نے مبینہ طور پر اسے تشدد اور جنسی زیادتی کا نشانہ بنایا جبکہ اس کی رقم بھی لے گیا۔پولیس کے مطابق متاثرہ خاتون کی درخواست پر تھانہ روات میں مقدمہ درج کرلیا گیا ہے۔ ایف آئی آر میں خاتون نے مؤقف اختیار کیا کہ تقریباً دو سال قبل بنکاک میں اس کی عامر سہیل نامی شخص سے ملاقات ہوئی، جس کے بعد دونوں میں دوستی ہوگئی۔متاثرہ خاتون کے مطابق ملزم نے اسے پاکستان آنے اور شادی کرنے کی یقین دہانی کرائی۔ تقریباً چار ماہ قبل وہ پاکستان آئی تو ملزم نے راولپنڈی میں کرائے کا ایک فلیٹ لے کر اسے وہاں رکھا۔ایف آئی آر کے مطابق پاکستان آنے کے بعد ملزم نے مبینہ طور پر متعدد مرتبہ زبردستی زیادتی کی جبکہ شادی کے مطالبے پر مختلف حیلے بہانے کرتا رہا۔ خاتون نے الزام لگایا کہ اسے فلیٹ سے باہر جانے کی بھی اجازت نہیں دی جاتی تھی۔

متاثرہ خاتون کا مزید کہنا ہے کہ واقعے کے روز ملزم نے اسے تشدد کا نشانہ بنایا، جس کے بعد وہ مشکل سے وہاں سے نکلنے میں کامیاب ہوئی اور طبی معائنے کے لیے ڈاکٹر سے رجوع کیا۔ خاتون کے مطابق ملزم جاتے ہوئے اس کی رقم بھی اپنے ساتھ لے گیا۔مقدمہ درج ہونے کے بعد پولیس نے معاملے کی تفتیش اسپیشل سیکشول انویسٹی گیشن یونٹ (SSIO) کے حوالے کردی۔ پولیس نے کارروائی کرتے ہوئے نامزد ملزم عامر سہیل کو گرفتار کرلیا اور اسے مزید تفتیش کے لیے تھانہ روات منتقل کردیا۔پولیس حکام کے مطابق گرفتار ملزم سے واقعے سے متعلق پوچھ گچھ جاری ہے جبکہ مقدمے کی مزید تفتیش شواہد اور متاثرہ خاتون کے بیان کی روشنی میں آگے بڑھائی جا رہی ہے۔