کراچی (این این آئی)صوبائی ڈیزاسٹر مینجمنٹ اتھارٹی (پی ڈی ایم اے) سندھ نے محکمہ موسمیات کی پیشگوئی کے بعد صوبے کے مختلف اضلاع میں 25 جولائی تک بارشوں اور طوفانی موسم کا الرٹ جاری کرتے ہوئے

تمام ضلعی انتظامیہ اور متعلقہ اداروں کو ہائی الرٹ رہنے کی ہدایت کردی ہے۔ڈی جی پی ڈی ایم اے سلمان شاہ کے مطابق حیدرآباد، تھرپارکر، عمرکوٹ، میرپورخاص، بدین اور سانگھڑ میں موسلادھار بارش کا امکان ہے، جبکہ ٹنڈو محمد خان، ٹنڈو الہیار، مٹیاری، جامشورو اور شہید بینظیر آباد میں بھی 25 جولائی تک بارشوں کی پیشگوئی کی گئی ہے۔انہوں نے بتایا کہ گھوٹکی، کشمور، جیکب آباد، شکارپور، سکھر اور خیرپور میں ہلکی سے معتدل بارش متوقع ہے، جبکہ لاڑکانہ، نوشہروفیروز اور ٹھٹھہ میں آج اور کل گرج چمک کے ساتھ بارش ہونے کا امکان ہے۔ڈی جی پی ڈی ایم اے نے خبردار کیا کہ تیز ہواؤں اور آسمانی بجلی کے باعث کمزور ڈھانچوں کو نقصان پہنچ سکتا ہے،

اس لیے تمام متعلقہ اداروں کو پیشگی حفاظتی اقدامات یقینی بنانے کی ہدایت جاری کردی گئی ہے۔انہوں نے کہا کہ پی ڈی ایم اے سندھ مون سون بارشوں سے نمٹنے کے لیے مکمل طور پر الرٹ ہے، ڈی واٹرنگ پمپس آپریشن کے لیے تیار رکھے گئے ہیں، جبکہ نشیبی علاقوں کی نشاندہی کرلی گئی ہے تاکہ اربن یا فلیش فلڈنگ کی صورت میں مشینری فوری طور پر متاثرہ علاقوں میں منتقل کی جا سکے۔