لاہور (این این آئی) پیٹرولیم مصنوعات مہنگی ہونے کے بعد گڈزٹرانسپورٹرز اورپبلک ٹرانسپورٹ نے کرایوں میں 10 فیصد تک اضافہ کردیا۔

پیٹرولیم مصنوعات کی قیمتوں میں حالیہ اضافے کے بعد مہنگائی کی ماری عوام پرایک اور بوجھ ڈال دیا گیا،لاہور سے مختلف شہروں کے کرایوں میں80 روپے سے ایک ہزار روپے تک اضافہ کر دیا گیا ہے، ٹرانسپورٹرز نے پیٹرولیم مصنوعات کی قیمتوں میں بار بار تبدیلی کے طریقہ کار پر بھی اعتراض اٹھایا ہے۔ٹرانسپورٹرز کا کہنا ہے کہ ایندھن کی قیمتوں میں مسلسل اضافے نے آپریٹنگ اخراجات بڑھادیئے ہیں، کرایوں میں اضافے کے باعث اشیائے ضروریہ مزید مہنگی ہونے کا خدشہ ظاہر کیا جا رہا ہے۔سیکرٹری ریجنل ٹرانسپورٹ اتھارٹی رانا محسن کے مطابق ٹرانسپورٹرز سے مشاورت کے بعد کم سے کم کرایوں میں اضافہ کیا گیا،مقررہ نرخوں سے زائد کرایہ وصول کرنے والوں کے خلاف سخت کارروائی کی جائے گی۔