اسلام آباد (نیوز ڈیسک)وزارتِ مذہبی امور نے ایران اور عراق کے مقدس مقامات کی زیارت کے خواہشمند افراد کے لیے اہم رہنمائی جاری کرتے ہوئے واضح کیا ہے کہ زائرین صرف رجسٹرڈ زیارت گروپ آرگنائزرز کے ذریعے ہی اپنی بکنگ کرائیں۔
وزارتِ مذہبی امور میں منعقدہ ایک اعلیٰ سطحی اجلاس میں نئی زیارت مینجمنٹ پالیسی پر عملدرآمد کا تفصیلی جائزہ لیا گیا۔ اجلاس میں وزارتِ داخلہ، وزارتِ خارجہ، وزارتِ مواصلات، سول ایوی ایشن اتھارٹی (سی اے اے) اور دیگر متعلقہ اداروں کے نمائندوں نے شرکت کی۔
اجلاس کے شرکاء نے اس عزم کا اظہار کیا کہ ایران اور عراق جانے والے زائرین کو ہر ممکن سہولت فراہم کی جائے گی۔ اس موقع پر سول ایوی ایشن اتھارٹی اور متعلقہ ایئرلائنز کو ہدایت کی گئی کہ فضائی سفر کے دوران زائرین کے لیے بہتر انتظامات اور سہولیات یقینی بنائی جائیں۔
بریفنگ کے دوران بتایا گیا کہ نئی زیارت پالیسی کے تحت اب تک 262 زیارت گروپ آرگنائزرز کو باقاعدہ رجسٹرڈ کیا جا چکا ہے۔ وزارت نے زائرین کو تاکید کی ہے کہ وہ صرف انہی منظور شدہ گروپس کے ذریعے اپنی سفری بکنگ مکمل کریں۔
ترجمان وزارتِ مذہبی امور کے مطابق تمام لائسنس یافتہ زیارت گروپس کی فہرست وزارت کی سرکاری ویب سائٹ پر دستیاب ہے۔ انہوں نے خبردار کیا کہ اگر کوئی شخص غیر رجسٹرڈ کمپنی یا فرد کے ذریعے بکنگ کراتا ہے تو ایسی صورت میں وزارت کسی بھی نقصان یا مسئلے کی ذمہ دار نہیں ہوگی۔
دوسری جانب وفاقی وزیر برائے بحری امور جنید انور نے حالیہ بیان میں کہا کہ ایران، عراق اور یمن کے سفیروں سے فیری سروس کے آغاز کے حوالے سے بات چیت کی گئی ہے۔ انہوں نے بتایا کہ متعلقہ ممالک کی فیری کمپنیاں وزارت سے رابطے میں آئیں تو اس منصوبے پر جلد پیش رفت ممکن ہے۔
انہوں نے امید ظاہر کی کہ پاکستان سے پہلی بین الاقوامی فیری سروس جلد شروع کی جا سکے گی، جبکہ پاکستان نیشنل شپنگ کارپوریشن (PNSC) میں بہتر کارکردگی دکھانے والے افسران کو آگے لانے کی پالیسی بھی جاری رکھی جائے گی۔
