اسلام آباد (نیوز ڈیسک)نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسی آپریشن سینٹر نے 7 سے 9 جولائی کے دوران سکردو اور رونڈو روڈ پر لینڈ سلائیڈنگ کے خدشے کے پیش نظر الرٹ جاری کر دیا ہے۔

این ڈی ایم اے کے مطابق شمالی علاقوں میں متوقع بارشوں اور پہاڑی علاقوں میں زمینی کٹاؤ کے باعث سکردو اور اس سے ملحقہ علاقوں میں مختلف مقامات پر مٹی اور پتھروں کے تودے گرنے کا امکان ہے۔ برومدو نالہ، چمچو، مالوپا، ڈمبوڈاس، ٹورمک اور ہراموش کے علاقوں کو خاص طور پر حساس قرار دیا گیا ہے۔

ادارے نے خبردار کیا ہے کہ مقامی ندی نالوں میں پانی کے بہاؤ اور کٹاؤ میں اضافے کی وجہ سے سڑکوں پر سفر خطرناک ہو سکتا ہے، جس کے باعث ٹریفک کی روانی بھی متاثر ہونے کا خدشہ ہے۔

این ڈی ایم اے نے سیاحوں اور مسافروں کو مشورہ دیا ہے کہ متاثرہ پہاڑی شاہراہوں پر غیر ضروری سفر سے اجتناب کریں اور اگر سفر ناگزیر ہو تو لینڈ سلائیڈنگ کے خطرے والے مقامات پر انتہائی احتیاط اختیار کریں۔

دوسری جانب مقامی ضلعی انتظامیہ اور متعلقہ اداروں کو بھی ممکنہ ہنگامی صورتحال سے نمٹنے کے لیے پیشگی انتظامات مکمل رکھنے کی ہدایت جاری کی گئی ہے تاکہ کسی بھی ناخوشگوار واقعے کی صورت میں فوری کارروائی کی جا سکے۔

این ڈی ایم اے نے عوام سے اپیل کی ہے کہ موسمی صورتحال اور حفاظتی ہدایات سے باخبر رہنے کے لیے پاک این ڈی ایم اے ڈیزاسٹر الرٹ ایپ اور دیگر مستند ذرائع سے مسلسل معلومات حاصل کرتے رہیں۔