اسلام آباد (نیوز ڈیسک) ملک کے کئی علاقوں میں موسم ایک بار پھر تبدیل ہونے کا امکان ظاہر کیا گیا ہے،
جبکہ نیشنل ڈیزاسٹر مینجمنٹ اتھارٹی (این ڈی ایم اے) نے شمالی اور پہاڑی علاقوں میں لینڈ سلائیڈنگ کے خدشات کے پیش نظر متعلقہ اداروں کو الرٹ جاری کر دیا ہے۔
محکمہ موسمیات کی پیش گوئی کے مطابق آزاد کشمیر، گلگت بلتستان اور خیبرپختونخوا کے بالائی اضلاع میں گرج چمک کے ساتھ بارش متوقع ہے، جبکہ بعض علاقوں میں ژالہ باری بھی ہو سکتی ہے۔ اس کے علاوہ جنوبی پنجاب، بلوچستان اور سندھ کے بالائی حصوں میں تیز ہواؤں، آندھی اور بارش کا امکان موجود ہے۔
وفاقی دارالحکومت اسلام آباد اور ملحقہ علاقوں میں جزوی ابر آلود موسم رہنے کا امکان ہے، جبکہ بعض مقامات پر گرد آلود ہوائیں چل سکتی ہیں۔ دوسری جانب کراچی اور اس کے نواحی علاقوں میں بھی ہلکی بارش اور تیز ہواؤں کی پیش گوئی کی گئی ہے۔
محکمہ موسمیات نے خبردار کیا ہے کہ دیر، چترال، سوات، مالاکنڈ، باجوڑ اور شانگلہ سمیت مختلف پہاڑی علاقوں میں تیز جھکڑ اور ہوا کے شدید تھپیڑے چل سکتے ہیں۔ بارشوں کے باعث مری، گلیات اور قریبی پہاڑی علاقوں کے ندی نالوں میں پانی کے بہاؤ میں اضافے کا خدشہ بھی ظاہر کیا گیا ہے۔
ادھر این ڈی ایم اے نے اپنی وارننگ میں کہا ہے کہ گلگت بلتستان، آزاد کشمیر اور خیبرپختونخوا کے شمالی پہاڑی علاقوں میں لینڈ سلائیڈنگ کے امکانات بڑھ سکتے ہیں، جس سے قراقرم ہائی وے سمیت اہم سڑکوں اور شاہراہوں پر آمدورفت متاثر ہونے کا خطرہ ہے۔
اتھارٹی نے تمام متعلقہ اداروں کو ہدایت کی ہے کہ حساس مقامات، پہاڑی راستوں، شاہراہوں اور سیاحتی علاقوں میں حفاظتی اقدامات کو یقینی بنایا جائے اور کسی بھی ہنگامی صورتحال سے نمٹنے کے لیے پیشگی انتظامات مکمل رکھے جائیں۔
