لاہور (این این آئی)موسم گرما کی تعطیلات کے دوران لاہور کے سرکاری سکولوں میں نجی پبلشرز کی ہوم ورک بکس طلبہ کو فروخت کیے جانے کا انکشاف سامنے آیا ہے،
جس پر ڈسٹرکٹ ایجوکیشن اتھارٹی نے نوٹس لیتے ہوئے تحقیقات کا آغاز کر دیا۔ذرائع کے مطابق لاہور کے بیشتر پبلک سکولوں میں پرائیویٹ پبلشرز کی ہوم ورک بکس طلبہ کو 200سے 300روپے میں فروخت کی گئیں۔ قواعد و ضوابط کے تحت طلبہ کو مفت ہوم ورک گائیڈ فراہم کی جاتی ہے جبکہ سرکاری سکولوں میں کسی بھی نجی پبلشر کی کتاب یا ہوم ورک بک لگانے کے لیے محکمہ تعلیم سے باقاعدہ منظوری لینا لازمی ہے۔
تعلیمی قواعد کے مطابق منظوری کے بغیر نجی پبلشرز کی کتابیں یا ہوم ورک بکس نصاب کا حصہ بنانا خلافِ ضابطہ اور قابلِ کارروائی عمل ہے۔معاملے کا نوٹس لیتے ہوئے ڈسٹرکٹ ایجوکیشن اتھارٹی لاہور نے اسسٹنٹ ایجوکیشن آفیسرز کو دو روز کے اندر رپورٹ جمع کروانے کی ہدایت جاری کر دی ہے۔ اتھارٹی کا کہنا ہے کہ قواعد و ضوابط کی خلاف ورزی ثابت ہونے پر متعلقہ سکول سربراہان کے خلاف کارروائی عمل میں لائی جائے گی۔
