اسلام آباد(نیوزڈیسک) اداکارہ مومنہ اقبال کی شکایت پر درج مقدمے کی ابتدائی تحقیقات میں بعض اہم انکشافات سامنے آئے ہیں۔

تفتیشی ذرائع کے مطابق رکن پنجاب اسمبلی ثاقب چدھڑ پر الزام ہے کہ انہوں نے اداکارہ اور ان کی بہن کو نامناسب نوعیت کا مواد ارسال کیا۔تحقیقات کے دوران یہ بھی معلوم ہوا کہ ملزم نے اپنا موبائل فون حکام کے حوالے کرنے سے قبل اس میں موجود تمام ڈیٹا حذف کر دیا تھا۔ ابتدائی رپورٹ کے مطابق مومنہ اقبال اور ان کی بہن رمشا اقبال کو بھیجے گئے مبینہ غیر اخلاقی مواد کے حوالے سے شواہد اکٹھے کیے جا رہے ہیں۔ذرائع کا کہنا ہے کہ ثاقب چدھڑ کی اہلیہ سمیرا پر بھی دھمکی آمیز پیغامات بھیجنے کا الزام عائد کیا گیا ہے۔ تفتیشی ادارے کے مطابق انہوں نے ابھی تک اپنا موبائل فون فرانزک جانچ کے لیے جمع نہیں کرایا۔مزید تحقیقات میں یہ دعویٰ بھی سامنے آیا ہے کہ مبینہ طور پر استعمال ہونے والی سم کا آئی ایم ای آئی نمبر ثاقب چدھڑ کے زیر استعمال موبائل فون سے مطابقت رکھتا ہے، جس کی مزید تکنیکی جانچ جاری ہے۔

دوسری جانب مومنہ اقبال کی بہن رمشا اقبال نے ثاقب چدھڑ کی جانب سے لگائے گئے الزامات کو مسترد کرتے ہوئے کہا ہے کہ اگر مالی لین دین یا تحائف دینے کے دعوے درست ہیں تو ان کے ثبوت عدالت میں پیش کیے جائیں۔ ان کے مطابق خاندان ان الزامات کے خلاف قانونی چارہ جوئی کا فیصلہ کر چکا ہے۔رمشا اقبال کا کہنا تھا کہ ان کی بہن کو طویل عرصے سے ہراساں کیا جا رہا تھا اور جب انہوں نے اس معاملے پر آواز اٹھائی تو انہیں سنگین نتائج کی دھمکیاں دی گئیں۔ انہوں نے الزام عائد کیا کہ شادی سے انکار کی صورت میں مومنہ اقبال کی مصنوعی ذہانت (AI) کے ذریعے جعلی ویڈیوز بنا کر سوشل میڈیا پر پھیلانے کی دھمکیاں بھی دی گئیں۔واضح رہے کہ مقدمے کی تفتیش جاری ہے اور حتمی حقائق عدالت اور متعلقہ تحقیقاتی اداروں کی مکمل کارروائی کے بعد سامنے آئیں گے۔