عیدالاضحیٰ کے موقع پر قربانی کے بعد سب سے بڑا مسئلہ گوشت کو زیادہ عرصے تک محفوظ رکھنا ہوتا ہے، خصوصاً اُن گھروں میں جہاں فریج یا ڈیپ فریزر دستیاب نہیں ہوتا۔ اسی وجہ سے لوگ مختلف گھریلو طریقوں سے گوشت کو خراب ہونے سے بچانے کی کوشش کرتے ہیں۔
پاکستان سمیت کئی ایشیائی ممالک میں مسلمان سنتِ ابراہیمی کی پیروی کرتے ہوئے جانور قربان کرتے ہیں، جبکہ عید کے دنوں میں گوشت محفوظ رکھنے کے لیے فریج اور ڈیپ فریزر کی خریداری میں بھی نمایاں اضافہ دیکھا جاتا ہے۔
ماہرین کے مطابق اگر چند احتیاطی تدابیر اختیار کی جائیں تو قربانی کا گوشت طویل عرصے تک قابلِ استعمال رکھا جا سکتا ہے۔
گوشت محفوظ رکھنے کے چند مفید طریقے درج ذیل ہیں:
1۔ گوشت کو فریز کرنے سے پہلے پانی سے دھونے سے اجتناب کریں، کیونکہ نمی کی موجودگی میں بیکٹیریا تیزی سے پیدا ہوتے ہیں، جس سے گوشت جلد خراب ہونے کا خدشہ بڑھ جاتا ہے۔
2۔ گوشت کو ہلکا سا بھون کر ٹھنڈا کریں اور پھر اچھی طرح ایلومینیم فوائل میں لپیٹ دیں۔ اس طریقے سے گوشت کافی عرصے تک محفوظ رہ سکتا ہے۔
3۔ اگر فریج دستیاب نہ ہو تو گوشت کی چھوٹی بوٹیاں بنا کر دھاگے میں پرو لیں اور انہیں کھلی ہوا اور دھوپ میں خشک ہونے کے لیے لٹکا دیں۔ مکمل خشک ہونے کے بعد یہ گوشت کئی ہفتوں تک استعمال کیا جا سکتا ہے۔
