اسلام آباد (نیوز ڈیسک) پولیس نے انمول عرف پنکی کی گرفتاری کے بعد ایک اور اہم کارروائی کرتے ہوئے
مبینہ منشیات فروش خاتون نرگس عرف ملکہ کو حراست میں لے لیا ہے۔پولیس حکام کے مطابق قائد آباد میں خفیہ اطلاع پر کارروائی کی گئی، جہاں سے نرگس عرف ملکہ کو گرفتار کیا گیا۔ حکام کا کہنا ہے کہ ملزمہ قانون نافذ کرنے والے اداروں کو مطلوب تھی اور منشیات کے ایک بڑے نیٹ ورک سے وابستہ تھی۔پولیس کے مطابق ملزمہ کے قبضے سے 35 کلو 265 گرام چرس برآمد ہوئی، جس کی مالیت 60 لاکھ روپے سے زائد بتائی جا رہی ہے۔ اس کے علاوہ ایک لاکھ روپے سے زیادہ نقد رقم بھی تحویل میں لی گئی۔ایس ایس پی ملیر عبدالخالق پیرزادہ نے بتایا کہ کارروائی خداداد قبرستان سواتی محلے میں کی گئی۔
ان کے مطابق برآمد ہونے والی منشیات کراچی کے مختلف علاقوں اور پوش مقامات پر سپلائی کی جانی تھیں۔پولیس حکام کا کہنا ہے کہ نرگس عرف ملکہ کے ساتھ اس نیٹ ورک میں دیگر افراد بھی شامل ہیں، جو شہر بھر میں منشیات کی ترسیل اور فروخت میں ملوث ہیں۔ مزید ملزمان کی گرفتاری کے لیے مختلف علاقوں میں چھاپے مارے جا رہے ہیں۔
