کراچی(این این آئی)شہر قائد میں ملکہ منشیات انمول عرف پنکی کی گرفتاری کے معاملے میں ایف آئی آر میں غلط پتہ درج ہونے کے بعد نیا تنازع کھڑا ہوگیا ہے

جس کے باعث بلال آرکیڈ کے رہائشیوں اور انتظامیہ میں شدید بے چینی پائی جا رہی ہے۔تفصیلات کے مطابق ایف آئی آر میں ملزمہ کو گارڈن ویسٹ بلال آرکیڈ فیز ٹو کے ایک فلیٹ سے گرفتار ظاہر کیا گیا تاہم حقیقت میں مذکورہ فلیٹ میں گزشتہ آٹھ سال سے ایک اور خاندان کرائے پر رہائش پذیر ہے۔غلط ایڈریس کے اندراج کے بعد متاثرہ خاندان نے موقف اختیار کیا ہے کہ انمول عرف پنکی کو ہم نہیں جانتے ہیں۔ جس فلیٹ کا پتہ مقدمے میں ڈالا گیا، وہاں 8 سال سے کرائے پر ہم رہائش پذیر ہیں۔متاثرہ خاندان نے کہا کہ میڈیا پر ملزمہ کی گرفتاری ہمارے فلیٹ سے ہونے کی خبر آنے پر مالک مکان نے فلیٹ خالی کرنے کا کہہ دیا۔متاثرہ خاندان کے مطابق انمول عرف پنکی کو ہم نہیں جانتے، بتایا جائے کہ پولیس نے ہمارے گھرکا پتہ ایف آئی آر میں کیسے ڈالا؟متاثرہ خاندان نے یہ بھی کہا کہ پولیس کی غفلت کی وجہ سے ہم سخت ذہنی اذیت کا شکار ہیں۔دوسری جانب بلال آرکیڈ کی یونین کے عہدیدار اور فلیٹ مالک سلیم احتجاجاً گارڈن تھانے پہنچ گئے۔

یونین عہدیدار کے مطابق پولیس نے ایف آئی آر میں درج غلط ایڈریس پر معذرت کر لی ہے۔یونین نے کہاکہ پولیس حکام نے ہدایت کی ہے کہ میڈیا نمائندوں کو فلیٹ میں داخلے یا مکینوں سے بات چیت کی اجازت نہ دی جائے۔مزید یہ کہ فلیٹ کے مالک نے وہاں رہائش پذیر فیملی کو نوٹس جاری کرتے ہوئے جگہ خالی کرنے کا بھی کہا ہے جس کے باعث متاثرہ خاندان مزید پریشانی کا شکار ہے۔یونین عہدیدار نے مطالبہ کیا ہے کہ پولیس اس سنگین غلطی پر میڈیا کے سامنے باقاعدہ وضاحت اور معافی پیش کرے تاکہ رہائشیوں کی مشکلات کم ہو سکیں۔