اسلام آباد (نیوز ڈیسک) وفاقی دارالحکومت میں 30 سالہ نوجوان کے قتل کے مقدمے میں پولیس نے ایک 19 سالہ لڑکی اور اس کے مبینہ ساتھی کو گرفتار کر لیا ہے۔
پولیس حکام کے مطابق مقتول فرخ چوہدری کو مبینہ طور پر شادی سے انکار پر نشانہ بنایا گیا۔ تفتیش کے دوران معلوم ہوا کہ کیس کی مرکزی کردار لڑکی ہے، جس پر الزام ہے کہ اس نے قتل کی منصوبہ بندی میں اہم کردار ادا کیا۔
تحقیقات کے مطابق مرکزی ملزم سیف اللہ، جو خیبرپختونخوا پولیس میں کانسٹیبل بتایا جا رہا ہے اور ایک ڈی ایس پی کا بیٹا ہے، کو سیدو شریف سے گرفتار کیا گیا، جبکہ لڑکی کو اسلام آباد سے 24 گھنٹوں کے اندر حراست میں لیا گیا۔
پولیس کے مطابق فرخ چوہدری کو اتوار کی رات سیکٹر ایف-6 میں واقع ان کے گھر سے اغوا کیا گیا۔ بعد ازاں انہیں مردان منتقل کیا گیا جہاں مبینہ تشدد کے بعد قتل کر کے لاش سڑک کنارے پھینک دی گئی۔پولیس کا کہنا ہے کہ لڑکی نے اغوا کاروں کو مقتول سے متعلق معلومات فراہم کیں۔ تحقیقات میں یہ بھی سامنے آیا کہ وہ ایک ہفتہ قبل مقتول کے گھر گئی تھی اور جعلی نام استعمال کرتے ہوئے اہل خانہ سے معلومات حاصل کی تھیں۔
حکام کے مطابق واردات میں استعمال ہونے والی گاڑی پر جعلی نمبر پلیٹ لگی ہوئی تھی، تاہم گاڑی کا سراغ ایم ٹیگ سسٹم کے ذریعے لگایا گیا۔ اغوا کے وقت لڑکی ایک آن لائن بک کی گئی ٹیکسی میں سوار تھی اور مبینہ طور پر اغوا کاروں کی گاڑی کے ساتھ ساتھ چل رہی تھی۔ایس پی سٹی کے مطابق کیس کی تحقیقات کے لیے چار خصوصی ٹیمیں تشکیل دی گئی تھیں، جو اسلام آباد، صوابی، مردان اور سوات میں کارروائیاں کر رہی تھیں۔
مقتول کا پوسٹ مارٹم پمز اسپتال میں کیا گیا، جہاں ابتدائی رپورٹ میں سر پر شدید چوٹ کو موت کی وجہ قرار دیا گیا۔ بعد ازاں فرخ چوہدری کی نماز جنازہ اسلام آباد میں ادا کی گئی۔
پولیس کے مطابق مرکزی ملزمان کی گرفتاری کے بعد اب دیگر سہولت کاروں کی تلاش اور گرفتاری کے لیے مختلف مقامات پر چھاپے مارے جا رہے ہیں۔
