اسلام آباد (نیوز ڈیسک) ضلعی انتظامیہ نے کفایت شعاری پالیسی کے تحت شہر میں کاروباری اوقات کار میں تبدیلی کرتے ہوئے نیا نوٹیفکیشن جاری کر دیا ہے۔

نوٹیفکیشن کے مطابق اب تمام دکانیں، مارکیٹس اور شاپنگ مالز ہفتے کے ساتوں دن رات 8 بجے بند کر دیے جائیں گے۔ تاہم بعض ضروری خدمات کو اس پابندی سے مستثنیٰ قرار دیا گیا ہے۔انتظامیہ کی جانب سے دی گئی رعایت کے تحت فارمیسیز، اسپتال، پیٹرول پمپس، ڈیری شاپس، اسپورٹس سہولیات اور آئی ٹی یا کال سینٹرز رات 10 بجے تک کھلے رہ سکیں گے۔ اس کے علاوہ ٹیک اوے اور ہوم ڈیلیوری سروسز پر کسی قسم کی وقت کی پابندی عائد نہیں ہوگی۔اسی طرح ریسٹورنٹس، فوڈ آؤٹ لیٹس اور گروسری اسٹورز کو بھی رات 10 بجے تک کاروبار جاری رکھنے کی اجازت دی گئی ہے۔

نوٹیفکیشن میں مزید کہا گیا ہے کہ شادی ہالز، مارکیز اور دیگر تقریبات کے مقامات بھی رات 10 بجے تک اپنی سرگرمیاں جاری رکھ سکیں گے، اور یہ اصول نجی تقریبات پر بھی لاگو ہوگا۔

انتظامیہ کا کہنا ہے کہ یہ فیصلے توانائی کے بہتر استعمال اور اخراجات میں کمی کے پیش نظر کیے گئے ہیں، جبکہ عوامی سہولت کو مدنظر رکھتے ہوئے بعض شعبوں کو نرمی فراہم کی گئی ہے۔